Pas Gjermanisë, para se t’i çelet drita jeshile Shqipërisë për çeljen e negociatave me BE-në, pritet që edhe qeveritë e vendeve të tjera skeptike si Franca dhe Holanda, të marrin një konfirmim nga parlamenti.
Holanda është një prej dy vendeve më skeptike për procesin e integrimit, e cila ende nuk e ka thënë fjalën e saj për vendimin që do të merret në 18 tetor për Shqipërinë.
Mësohet se në datë 4 tetor qeveria e Holandës do t’i drejtohet parlamentit me një letër për fatin e hapjes ose jo të negociatave për anëtarësimin e Shqipërisë në Bashkimin Europian.
Parlamenti holandez do të marrë vendim më 8 Tetor për çeljen ose jo të bisedimeve për anëtarësimin e Shqipërisë.
Në qershorin e 2018 parlamenti holandez votoi kundër hapjes së negociatave, madje propozoi edhe heqjen e vizave me Shqipërinë, propozim që u hodh poshtë nga KE.
Më 8 Tetor është i rëndësishëm fati i integrimit të Shqipërisë në BE, pasi edhe Franca gjatë muajit Tetor pritet ë ndjekë të njëjtën rrugë. Por këto dy vende kanë pasur të njëjtat qëndrime karshi vendit tonë, çka do të thotë se në koherencë me këshillat e Gjermanisë, do të vendosin edhe ato fatin e mëtejshëm për vendin tonë, fat që do të mësohet më 18 Tetor.
Holanda është treguar deri tani më radikalja në qëndrime, ndërsa Gjermania i zbuti tonet, me disa kushte të forta, që ndoshta do të ketë ndikim edhe te votimi i Parlamentit Holandez. Shqipërisë nuk i çelen negociatat, edhe nëse e kundërshton një nga 28 vendet anëtare të BE-së. /l.m
