Në kuadër të festës së 28 nëntorit kryetari i Parlamentit Ilir Meta përcolli nga Shkodra urimet më të përzemërta për shqiptarët.
Për sa i përket reformës në drejtësi, Meta deklaroi se shpresonte që ajo të ishte e plotë.
Meta u shpreh edhe për negociatat e Shqipërisë me BE-në, duke qenë optimist se në muajin dhjetor Këshilli i Europës do të rekomandojë hapjen e negociatave për vendin tonë.
“Jemi optimist për dhjetorin dhe për reformën në drejtësi se do të përmbyllet e plotë”, deklaroi Meta.
“Për mua është një kënaqësi për t’ju uruar të gjithëve ju, gëzuar Festën e 28 Nëntorit! Festë mjaft e rëndësishme në historinë e vendit tonë, por edhe mjaft kuptimplotë për të ardhmen evropiane të vendit tonë, e cila mendoj se është edhe më e sigurt në këtë festë dhe shpresojmë që të ecim në këtë rrugë”, – u shpreh Kryetari i Kuvendit, raporton express. I pyetur nga gazetarët se deri kur klasa politike shqiptare do të vazhdojë të festojë e ndarë 28 dhe 29 Nëntorin, Meta bëri apel që kjo kulturë e vjetër e ndarjeve duhet t’i i takojë të kaluarës.
“Mendoj se kultura e vjetër e ndarjeve dhe përjashtimeve duhet t’i takojë të kaluarës dhe 29 Nëntorin nuk e keni vendosur ne. Atë e kanë vendosur ata që çliruan Shqipërinë. Kështu që kjo është një ditë që i fton të gjithë për të nderuar ata që sakrifikuan për çlirimin e vendit”, – deklaroi Kryetari i Kuvendit, Meta nga Shkodra.
