Kreu i Partisë Demokratike, Sali Berisha tha gjatë emisionit “Opinion” këtë të enjte, se “fakti që ata ofrohen pa kushte, është një moment i cili me të vërtetë mund të realizohet një bashkim i të gjithë Partisë Demokratike”. Komentet kryedemokrati i bëri pasi u pyet në lidhje me negociatat me grupin tjetër në Partinë Demokratike. Berisha tha se i njeh ata si anëtarë dhe deputetë të PD.
Sali Berisha: Unë mendoj se bisedimet do të qartësojnë çdo aspekt.
Jonida Shehu: Në bisedime mund të jetë çështja e tërheqjes në gjykatë?
Sali Berisha: Nuk paragjykoj asgjë. Unë ju them këtu që hapat që ata kanë bërë për mendimin tim janë plotësisht të pranueshme. Ne kemi qenë të hapur dhe jemi të hapur absolutisht pa kushte. Tani po filluam kushtet nuk ka marrëveshje.
Robert Rakipllari: Ka një ndryshim të qëndrimit të tij ndaj tyre, sepse deri para një jave ju thonit që Alibeaj është i dërguari i Ramës. A ka një ndryshim të qëndrimit të tyre ndaj tyre?
Sali Berisha: Sigurisht që jam i hapur ndaj tyre dhe këtë që them e them në mënyrën më serioze!
Robert Rakipllari: E tërhiqni këtë që keni thënë? Ata i kontrollon Rama apo jo? I konsideroni si faktor opozitar.
Sali Berisha: Se kush i kontrollon ata do e dëshmojnë me qëndrimet e tyre.
Robert Rakipllari: Tani, në negociatë?
Sali Berisha: Në negociatë, në qëndrime në të gjitha. Mendoj se deklaratat e tyre dhe dëshira e tyre për t’u bashkuar në një betejë, ata janë të gjithë, e kam theksuar, e theksoj, që të gjithë anëtarë, deputetë të Partisë Demokratike.
Robert Rakipllari: Pavarësisht se situata është pak paradoksale në PD. Ju jeni kryetar i PD dhe jeni zgjedhur, përfaqësoni shumicën, kjo është e qartë. PD zyrtare përfaqësohet nga Alibeaj, sigla i takon atij. Edhe ai para disa ditësh ka thënë PD jemi ne? Do futemi me kandidatë zyrtarë. Si do zgjidhet ky ngërç
Sali Berisha: Gjykata ka një vendim.
Robert Rakipllari: Parlamenti njeh Alibeajn kryetar grupi parlamentar.
Sali Berisha: Them që gjykata ka një vendim, i njohur nga të gjithë shqiptarët. Nuk them se nuk ekzistojnë probleme. Fakti që ata ofrohen pa kushte, është një moment i cili me të vërtetë mund të realizohet një bashkim i të gjithë Partisë Demokratike në këtë rast dhe të ecet i sigurt drejt një fitoreje. Në negocioatë i njoh si anëtarë të PD-së, si deputetë të PD-së. Kjo është e barazvlefshme me 1, me 15, me 30 me cilindo. Për PD-në ata janë anëtarë dhe janë deputetë të PD-së.
/a.r
