Nga Dritan Hila
Opozita ka deklaruar se do të ndërpresë mitingjet deri në datën 18 kur merret vendimi për hapjen e negociatave për anëtarësimin tonë në BE.
Në të njëjtën linjë është edhe presidenti.
Gjithsesi tashmë shumë pak e vrasin mendjen nëse do hapen apo jo. Shqiptarët e kanë mësuar se edhe në u hapshin, koha që do t’ia ndiejnë lezetin, do të vijë vonë. Mbase ata qe po lindin tani. Shqiptarët e kanë mësuar se askush nuk e ka seriozisht në këtë vend. E para nuk e ka qeveria e cila tani paska zbuluar se Ditmir Bushati ka abuzuar me postin. Ndërkohë mjaft të shikonte emrat e të emëruarve të tij për të mësuar se e mbushi dikasterin me kushërinj dhe ktheu dikasterin e dytë për nga rëndësia, në një skenë të histerive të tij ditore.
Ne jemi vendi ku sapo hap sytë në mëngjes do mësosh se ato që fqinjët tanë i marrin me financime evropiane, ne i kemi dhënë me PPP, duke hedhur lakun edhe për 30 vitet që vijnë këtij vendi.
Ndërkohë opozita bën të bukurin shejtan. Në vend se të ulet dhe të diskutojë sistemin zgjedhor dhe hapjen e sistemit; të përmirësojë kuadrin ligjor dhe krijojë mundësi për alternativa të reja dhe hapësira lirie, është e preokupuar të ruajë këtë sistem pasi mendon se shishes që ka vënë në radhën e pushtetit, po i vjen siraja.
E ka gabim. Shishja është thyer. Faji j saj është po aq i madh sa i pushtetit. Pak shqiptareve ju duhet nëse vjen apo jo Basha në pushtet, ndërkohë që ajo çka ofron është vetëm fytyra e tij dhe një tufë ndjekësish me lugë në brez që presin të zëvendësojnë ngrënësit e tepsisë.
Ndaj shqiptarët ikin. Do shkojnë të bëjnë në perëndim punëtorin e pakualifikuar. Do të jenë baza e zinxhirit ushqimor dhe të fundit në rangun social. Dhe kjo për faj të arsimit skadent dhe emrit ibret që na kanë bërë të kemi në Evropë.
Gjithsesi secili prej tyre në atë të vetën po përpiqet të jetë pak Ditmir, ama më i ndershëm se ai, pasi nuk po abuzojnë me karrigen si Ditmiri, por po marrin rrugët e botës pa pasaportë diplomatike dhe kushërinjve nuk do iu japin fole në ambasada por një shtrat ku të flenë derisa të gjejnë punë.
E ndërkohë Evropa duket se është lodhur me ne. Vetëm se shpresojmë që kjo lodhje nuk do bëjë që të na flakin por ashtu të lodhur siç janë me ne, të na pranojnë në gjirin e tyre dhe të na bëjnë, ashtu siç na kanë bërë edhe shtet para 107 viteve.
Pavarësisht injorancës tonë kur tallemi me ambasadorët e saj, ata janë e vetmja shpresë që të na drejtojnë duke na futur në gjirin e saj. Duke shpresuar se nuk e dinë shprehjen që “gungaçin e drejton vetëm varri”, nuk do të na lënë që të na drejtojë gropa që i kemi hapur vetes dhe varrmihësit që votojmë çdo katër vjet.
(dritare.net)
