Për kryeministrin Edi Rama, ata që sot përfaqësojnë opozitën janë “njerëz që në vend të gjuhës kanë bisht”. Nga Kolonja, Rama tha se shqiptarët nuk duhet ta vënë në diskutim zgjedhjen mes qeverisë dhe një personi që nuk e do Amerika sepse është i korruptuar.
Teksa komentoi protestat e opozitës, të cilat janë paralajmëruar për në 12 nëntor, Rama u shpreh se përdorin kufomat për të ngritur njerëzit kundër vetës dhe kundër shtetit.
“Si mundet ky vend të vërë në diskutim një zgjedhje midis dikujt që nuk ka lënë të keqe pa i bërë këtij vendi, që është fatkeqësisht pjellë e këtij vendi dhe miqve tanë më të mëdhenj që thonë se me këtë lloj personazhi ne nuk duam të kemi të bëjmë, sepse është i korruptuar dhe i inkriminuar. Ca duhet më shumë? Si mund të mos mjaftojnë këto gjera që kanë ndodhur dhe që vazhdojnë të ndodhin për tu distancuar përfundimisht jo thjesht një person por nga një grup personash, që fytyrën kanë prej njeriu, por në vend të gjuhës kanë bisht. Njerëz me bisht në vend të gjuhës, që janë gati të kafshojnë përditë deri në kufoma nga mëngjesi në darkë, përpara kamerave.
Për çfarë shqyhet një kufomë, duke i thënë që e vrau policia dhe shteti, për ti ngritur njerëzit kundër shtetit dhe për ti nxitur njerëzit kundër vetevetës, për të bërë përmes kufomash shërbimin e atyre të rublave”, u shpreh kryeministri.
/e.d
