‘Ne shqiptarët s’jemi xhihadistë që prishim kishat, por besimtarë që ndërtojmë kisha’
“Ne shqiptarët nuk jemi xhihadistë që prishim Kishat, por njerëz të ndërgjegjshëm, besimtarë tolerantë që ndërtojmë kisha.” Është kjo përgjigjia që meshtari i Kishës së fshatit Derven në Krujë, Pashk Cypi jep në një intervistë për Java News, pas deklaratës të bërë nga Athina zyrtare që erdhi si pasojë e shembjes prej INUV-it, të kishës së Shën Thanasit në Dhërmi.
Në intervistën për Java News, Cypi përbuz deklaratën e bërë nga autoritetet e Ministrisë së Jashtme Greke, ndërsa tregon me plot pasion historinë për ndërtimin e Kishës së Shën Kollit në fshatin e tij. Kjo kishë është ndërtuar me kontributin e 45 familjeve të fshatit, pjesa më e madhe e tyre myslimane.
“Pa dallim feje, myslimanë dhe të krishterë, janë bashkuar vullnetarisht për të ndërtuar Kishën për të cilën u jemi shumë mirënjohës”, thotë Pashk Cypi. Ai tregon se Kisha e Shën Kollit ka kushtuar rreth 3 milionë lekë, ndërsa thekson se mes të krishterëve dhe myslimanëve nuk ka probleme e nuk ka patur kurrë.
Derveni shtrihet vetëm pak kilometra nga qyteti i Fushë-Krujës, një fshat i madh me rreth 800 banorë. Shumica dërrmuese janë myslimane ashtu si në të gjithe zonën përreth ku përfshihen Luzi, Borizana, Zalla por edhe Fushe-Kruja, mese 80 përqind e banoreve janë të këtij besimi.
