Së shpejti, në Shëngjin dhe Gjadër të Lezhës do të mbërrijnë njëqind emigrantët e parë nga Italia. Qeveria italiane i ka dhënë dritën jeshile transferimit të emigrantëve nga Qendrat Italiane të Paraburgimit dhe Riatdhesimit drejt ambienteve në Shqipëri.
Kjo nismë është pjesë e marrëveshjes dypalëshe midis Romës dhe Tiranës për njohjen ekstraterritoriale dhe është pjesë e strategjisë së qeverisë Meloni për të zgjidhur emigracionin e paligjshëm.
Kriteret e transferimeve – Operacionet do të fillojnë në ditët në vijim dhe do të ndjekin dy kritere kryesore:
1.Emigrantët e rrezikshëm socialë. Prioritet do të kenë ata që konsiderohen të dhunshëm ose përgjegjës për trazirat në qendrat e ndërtuara enkas në Itali për ta.
2.Dëbimet e menjëhershme. Emigrantët që duhet të riatdhesohen brenda pak javësh do të transferohen në Shqipëri.
Për të “qetësuar” Qeverinë shqiptare, Italia ka garantuar se nëpër qendra do të kalojnë vetëm emigrantët tashmë të destinuar për dëbim. Kjo metodë synon të shmangë problemet në Shqipëri si pasojë e zgjedhjeve parlamentare.
Me transferimet e para në Shqipëri që priten që në fillim të javës së ardhshme, Italia po përgatitet të testojë një model që mund të bëhet një pionier për menaxhimin e flukseve të emigracionit në Europë.
