Operacioni “Forca e Ligjit”, i njohur edhe si paketa “Anti-KÇK”, iu dërgoi sot formularët paralajmërues dy “të fortëve” të Fierit dhe Lushnjës, duke i urdhëruar të deklarojnë pasuritë e tyre brenda 48 orëve.
Saimir Taullau, iu shpëtoi për fat dy atentateve, vëllai iu vra nga banda e Aldo Bares
Saimir Tuallau njihet edhe si biznesmen në qytetin e Lushnjës, dhe më 24 nëntor 2018, iu bë një atentat në rrethrrotullimin e Plugut, para lokalit të tij. 49-vjeçari është vëllai i Baki Taullaut dhe është i skeduar nga Policia e Shtetit si një person me precedent të mëparshëm penalë. Taullaut iu bë edhe një tjetër atentat, në vitin 2017. Familja Taullai njihet si rivale e fortë e Aldo Bares. Në vitin 2005, Baki Taullau u vra, ndërkohë që Saimiri, vëllai i tij, ishte dëshmitar në gjyq, ku ka dëshmuar dhe ka akuzuar si autorë të vrasjes, pjesëtarët e këtij grupi me urdhër të Bares. Konflikti ka nisur në vitin 1997, kur banda e Aldo Bares rriti influencën në Lushnje. Familja Taullau kishte në pronësi një pikë karburanti dhe disa biznese. Bare kërkoi të rekrutonte në grup Saimir Taullaun, i cili refuzoi. Në dëshminë e tij, para gjykatës në vitin 2008, Saimir Taullau, ka thënë se i vëllai i tij, Baki Taullau, ishte pre e gjobave të grupit të Aldo Bares. Siç dëshmonte asokohe Taullau, i vëllai i tij i kishte paguar disa herë gjobat që grupi i Bares i kishte vendosur, dhe kur ai nuk i pagoi më, atëherë atë e vranë.
Ben Qimja, ‘pronari’ i Fierit që u lirua nga Gjykata me vetëm 11 ditë burg
Arben Isufaj, i njohur ndryshe edhe si ‘Ben Qimja’ ka patur një ‘luftë’ me drejtësinë italiane e cila e ka kërkuar prej vitesh që ta hetojë për trafik droge. Qimja u arrestua në vitin 2014, por gjykata e Fierit jo vetëm që nuk u arrestua, por edhe u lirua nga burgu me vetëm 11 ditë burg. I cilësuar si i forti i Fierit, ka pasur më herët një përballje të gjatë me drejtësinë shqiptare, ku mundi të sfidojë prokurorinë. Ai dyshohej për vrasjen e Piro Koçiut, më 12 gusht 2002, në një pallat në rrugën “Him Kolli” në Tiranë.
Në dosje thuhet se Koçiu ka dalë me vrap nga shkallët e pallatit, dhe në oborrin e tij është penguar nga një person. Në këto momente, Koçiu është rrëzuar dhe është qëlluar me shqelma dhe me grushta nga dy persona, ku njëri nga ata e ka qëlluar në distancë fare të afërt në kokë me pistoletë, ku për pasojë ka gjetur vdekjen në vend. Në një rrugicë qorre që të nxirrte në rrugën “Myslim Shyri” në Tiranë, janë gjetur dy armë zjarri, njëra pistoletë tip ‘Zastava’ dhe tjetra ‘Mauser’, të cilat dyshohet se ishin përdorur në vrasjen e Koçiut.
Dyshimet për vrasjen ranë mbi Arben Isufajn, pasi një gjurmë e pjesshme gishti e gjetur në një krehër pistoletë, rezultonte të ishte lënë nga i pandehuri. Duke qenë se ekspertët dilnin në përfundime të ndryshme lidhur me provën më kryesore që vendoste për fatin e Isufajt, prokuroria vendosi të pushojë hetimet ndaj tij. Më 1 tetor 2007, hetimet ndaj të njohurit si Ben Qimja u hapën dhe ai u vu nën akuzën e “vrasjes me paramendim”, në bashkëpunim.
I dyshuari kërkoi pushimin e çështjes, duke pretenduar se aktet e prokurorisë ishin absolutisht të pavlefshme. Kërkesa e të pandehurit Arben Isufaj u pranua nga Gjykata e Tiranës, e cila vendosi të pushojë çështjen penale ndaj tij dhe të lirojë nga qelitë biznesmenin, i cili njihet në Fier si pronari i qytetit.
g.kosovari
