Policia e Shkodrës thotë se ka zbardhur ngjarjen e ndodhur gjatë orëve të mbrëmjes së djeshme në Velipojë, ku është tentuar që të vriten me armë zjarri dy persona.
Si të dyshuar për ngjarjen janë vënë në pranga dy të dyshuar dhe një tjetër është shpallur në kërkim.
Ngjarja ndodhi afërsi të një lokali në Velipojë ku pati të shtëna me armë.
Pas marrjes së informacionit u bë rrethimi dhe krehja e zonës ku u bë e mundur kapja e dy personave dhe shoqërimi i tyre në ambientet e policisë, së bashku me automjetin me të cilin ishin larguar nga vendngjarja.
Në përfundim të veprimeve të para hetimore u bë arrestimi në flagrancë i Fatjon Prelës 28 vjeç, banues në Shkodër dhe Albert Firkuqja, 30 vjeç, banues ne fshatin Rec, Velipojë.
Nga tërësia e veprimeve hetimore rezultoi se dy të rinjtë, në bashkëpunim me njëri-tjetrin, në afërsi të një lokali në Velipojë, rreth orës 22:20 të mbrëmjes së djeshme kanë tentuar të vrasin me armë zjarri, për motive të dobëta, I. H., 31 vjeç dhe G. M., 36 vjeç, të dy banues në Shkodër.
Të dyshuarit, pas ngjarjes, janë larguar në pyll, por janë kapur nga forcat e policisë së. Gjatë kontrollit u janë gjetur edhe disa doza me lëndë kanabis sativa, të cilat u sekuestruan së bashku me mjetin në pronësi të Fatjon Prelës.
Arrestimi i këtyre shtetasve u bë për veprat penale “Vrasja në rrethana cilësuese”, e mbetur në tentativë, e kryer në bashkëpunim, “Armëmbajtja pa leje” dhe “Prodhim dhe shitja e lëndëve narkotike”.
Ndërkohë gjatë konfliktit, shtetasi I. H., ka qëlluar me armë zjarri pistoletë, duke dëmtuar mjetin e shtetasit Fatjon Prela, me të cilin po largoheshin të dy autorët.
Ndërsa shtetasi G. M. është lënduar lehtë dhe pas marrjes së ndihmës së parë është larguar në banesë
Në vijim të veprimeve u bë shpallja në kërkim e shtetasit I. H., për veprat penale “Vrasja në rrethana cilësuese” e mbetur në tentativë, “Armëmbajtja pa leje” dhe vijon intensivisht puna për kapjen e tij.
Aktualisht vijon puna për zbardhjen e plotë të rrethanave të ngjarjes, identifikimin dhe kapjen e autorëve të tjerë të implikuar në këtë ngjarje, si dhe krehja e zonës, për gjetjen e armëve që kanë përdorur autorët.
/a.r
