Italia do të ndihmojë Shqipërinë, si nga ana financiare ashtu edhe nga ana e mbështetjes me kapacitete të tjera në rast se vendi ynë do të përballet me një fluks të emigrantëve.
Kjo ishte temë e diskutimeve gjatë takimi që Kreu i Policisë së Shtetit Haki Çako zhvilloi sot me Prefektin Giovanni Pinto, Drejtor i Përgjithshëm për emigracionin dhe Kufirin pranë Ministrisë së Brendshme Italiane.
Sipas njoftimit zyrtar të policisë në takimin e zhvilluar në Drejtorinë e Policisë u trajtuan tematikat aktuale në lidhje me imigracionin e paligjshëm. Delegacionet ranë dakord për një bashkëpunim konkret në rast të flukseve abnorme të imigrantëve të parregullt drejt Shqipërisë.
Delegacioni Italian siguroi palën shqiptare se në një rast fluksi të emigrantëve do kontribuojnë për një kontroll sa më efikas të flukseve, kontribut në lidhje me pritjen e imigrantëve, kanalizim të informacionit dhe shkëmbim në kohë reale nëpërmjet një pike kontakti apo një qëndre, si dhe për mbështetje për një bashkëpunim më të lartë nëpërmjet organizmave sikurse është FRONTEX.
Nga pala Shqiptare u tregua gatishmëri e plotë për të gjitha këto tematika, por edhe u theksua se aktualisht ka një shkëmbim në kohë reale të informacionit në bazë ditore nëpërmjet koordinatorit kombëtar me policinë italiane dhe zyrës ndërlidhëse INTERFORZA në Shqipëri, sikurse kryhen kontrolle të përbashkëta të vijës detare të Policisë së Shtetit së bashku me Guardia di Finanza në Durrës dhe Vlorë.
Të dyja palët ranë dakord në lidhje me forcimin e bashkëpunimit në fushën e imigracionit dhe mirëpritet çdo nismë në këtë drejtim pa lënë mënjanë edhe nismat e shumta në fushat e tjera.
Delegacioni italian më herë zhvilloi takime të nivelit të lartë me Ministrin e Punëve të Brendshme Saimir Tahiri, I dhe më pas në Drejtorinë e Policisë së Shtetit ku u takuan me përfaqësues të lartë nga Policia e Shtetit, Kryeministria dhe Ministria e Punëve të Jashtme
