Në mitingun përmbyllës në Vlorë, kryetari i PD, Lulzim Basha ka deklaruar se prioriteti kryesor i tij si kryeministër do të jetë rritja ekonomike dhe ulja e taksave. Basha akuzoi Ramën se pasi nuk mbajti asnjë premtim, riciklon sërish premtimet e vjetra.
Basha tha se e gjithë Shqipëria i ka provuar në kurriz mashtrimet e Ramës dhe është e turpshme që në Vlorë nuk ka ujë.
‘Taksat e larta, çmimet e larta, arroganca, harresa totale për rininë vlonjate, u bënë 3 sezone turistike që Vlora nxin dhe nuk u zbardh sepse nuk e ndërtove lungomaren.
Janë vite dështimi të paralajmëruara për premtime të pambajtura, për prioritete të gabuara.
Pas 4 vitesh braktisjeje, arrogance dhe përbuzjeje dhe prioritetesh të gabuara që kurrë nuk prodhuan një lek, vjen sërish me të njëjtat premtime.
Ramës i kanë mbetur mashtrimet e fundit, para se Vlora e bashkuar ti prijë fitoren Republikës së Re.
Republika e re do të ulë çmimin e energjisë, do të heqë taksën Rama, do të ulë taksën për biznesin. Përmes eliminimit të tvsh-së për gjithë paketat turistik ne do ti japim vlonjatëve mundësinë që të tërheqin sa më shumë turistë dhe paratë të jenë për xhepat e tyre dhe jo për pushtetarët e pangopur.
Gjatë fjalës së tij, lideri i opozitës deklaroi se nuk jemi mbledhur për timonin e Lulzim Bashës, pasi sipas tij timoni u përket të gjithëve, por për t’i dhënë hov rritjes ekonomike.
Ne nuk jemi këtu për timonin e Lulzim Bashës, sepse timoni i përket gjithsecilit prej jush, asnjë shofer tjetër nuk e di më mirë se shqiptarët rrugën.
Me Lulzim bashën kryeministër prioritet do të jetë motorri i ekonomisë’, deklaroi Basha.
a.ç
