Policia e Norvegjisë qëlloi vetëm dy herë me armë gjatë vitit të kaluar – pa lënduar askënd – sipas një statistike të publikuar së fundmi.
Policët në vendin nordik nxorën armët vetëm 42 herë në 2014-ën, numri më i ulët në 12 vitet e fundit. Vetëm dy persona janë vrarë nga të shtënat e policisë në këtë periudhë.
Shumica e efektivëve të policisë norvegjeze, sikurse ata në Britaninë e Madhe, Irlandë dhe Islandë, patrullojnë të paarmatosur dhe mbajnë armë vetëm në rrethana të veçanta.
Edhe në Britani policia ka ngjashmëri me Norvegjinë në përdorimin e pakët të armëve. Vetëm një person u qëllua fatalisht nga policia britanike në 2014-ën.
Ndërkohë në Shtetet e Bashkuara, ku policët janë të armatosur gjatë tërë kohës, 547 njerëz u vranë nga policia vetëm në gjashtë muajt e parë të 2015-ës, 503 prej të cilëve nga të shtënat me armë.