Skënderbeu, Kukësi, Partizani dhe Teuta do të njihen pas pak me kundërshtarët e tyre në Kupat e Evropës.
E para që do të njohë kundërshtarin është skuadra kampione e Shqipërisë, pasi shorti i Champions League hidhet në orën 12:00, ndërsa për Europa League një orë më pas.
Skënderbeu e nis nga raundi i dytë kualifikues dhe është midis skuadrave të vazos së parë, falë koeficentit të përmirësuar sezonin e kaluar.
Në raundin e parë do të luajnë The New Saints FC i Uellsit, Valletta e Maltës, Flora Talin e Estonisë dhe Santa Coloma e Andorës, përballë të cilave do të jenë përballë B36 Tórshavn të Ishujve Faroe, Lincoln të Gjibraltarit, Alashkert i Armenisë dhe Tre Penne i San Marinos.
Fituesit e këtij raundi do të luajnë në të dytin.
Skënderbeu është në vazon e dytë të skuadrave favorite, së bashku me APOEL Qipro, Legia Varshavë, Ludogorets Bullgari, Astana Kazakistan dhe Dinamo Tbilisi.
Kundërshtari i korçarëve do të dalë nga vazoja që brenda saj mban goglat me emrat e Žalgiris Vilnius të Lituanisë, fituesin e çiftit 2 në raundin e parë kualifikues, Ferencvárosi i Hungarisë, Zrinjski i Bosnjë Hercegovinës, fituesi i çiftit 4 në raundin e parë dhe Mladost i Podgoricës të Malit të Zi.
Skënderbeu ka mbi vete dënimin e UEFA-s, i cili është lënë pezull, për t’u vendosur përfundimisht më 5 ose 6 korrik, një javë para ndeshjeve të para të raundit të dytë eliminator, të cilat luhen më 12/13 dhe 19/20 korrik.
Europa League
Në Europa League, të treja skuadrat shqiptare do të marrin pjesë që në raundin e parë kualifikues, vetëm se Kukësi bën pjesë në vazon e parë të grupit 7 dhe kundërshtari i mundshëm do të dalë nga Balzan i Maltës, Chikhura Sachkhere e Gjeorgjisë, Spartak Myjava e Sllovakisë, Sloboda Tuzla e Bosnjë Hercegovinës dhe Rudar Pljevlja i Malit të Zi.
Kundërshtari i Teutës do të jetë midis Cracovia të Polonisë, Spartak Trnava i Sllovakisë, Kairat Almaty i Kazakistanit dhe Omonia e Qipros.
Partizani është gjithashtu në vazon e dytë, në grupin 10 të ndarjes së skuadrave nga UEFA. Kundërshtari i të kuqve do të dalë nga Dacia Kishinjev e Moldavisë, Aktobe e Kazakistanit, Zagłębie Lubin i Polonisë dhe Slovan Bratislava e Sllovakisë.
d.i.
