Një histori e ngjashme me ato të skenareve hollivudian, me protagoniste një grua të re 30-vjeçare është tashmë një çështje penale e Policisë së Shtetit. Bëhet fjalë për një nënë që ka braktisur dy fëmijët e saj të mitur dhe është larguar jashtë Shqipërisë. Prej disa ditësh, 30-vjeçarja me inicialet K.M. është larguar nga banesa e saj në qytetin e Gramshit, ku ka lënë të vetëm dy fëmijët e mitur.
Gruaja nuk ka kontaktuar me asnjë prej të afërmve prej momentit kur humbi kontaktet, dhe për momentin përjashtohet mundësia se mund të ketë qenë vitkimë e ndonjë krimi. Kjo për faktin se është vërtetuar se gruaja ka lënë Shqipërinë me vullnet të lirë. Në datën 27 Prill, ajo është larguar drejt Italisë nga aeroporti i Rinasit. Ndërkohë, të afërmit e saj nuk kishin asnjë informacion për veprimin e saj, deri në momentin kur panë se gruaja nuk po kthehej në shtëpi ku kishte braktisur dy fëmijët e mitur.
Zhdukja e saj u denoncua në komisariatin e Gramshit nga të afërmit. Ndëkrohë verifikimet zbuluan se 30-vjeçarja kishte lënë Shqipërinë. Ndërkohë, dosja i ka kaluar për veprime të mëtejshme prokurorisë nga ku pritet të ketë kokunikime me agjensitë partnere ligjzbatuese për evidentimin e gruas së re.
HETIMET
Janë disa pista hetimi që po ndiqen nga autoritetet për motivet që çuan në largimin e gruas së re e cila braktisi fëmijët e saj, për t’u larguar jashtë vendit. Dyshimet më të forta janë se 30-vjeçarja ja mbathi për të nisur një jetë të re me të dashurin e saj jashtë Shqipërisë. Sipas dyshimeve, mendohet se gruaja ka braktisur fëmijët pasi mund të jetë refuzuar nga personi që e priste. Këto janë vetëm dyshimet paraprake, pasi prokuroria pritet të kryejë verifikimin e tabulateve telefonike.
Ato pritet të hedhin më shumë dritë mbi komunikimiet që ka pasur gruaja para se të largohej. Po ashtu, pritet të verifikohen edhe kamerat e sigurisë në momentet e largimit nga Rinasi të gruas, nëse ka qenë në shoqërinë e dikujt tjetër apo e vetme. “Nuk përjashtohet edhe mundësia që ajo të ketë rënë pre e ndonjë grupi trafiku”, tha një burim nga policia. Dyshohet se ajo mund të ketë rënë pre e mashtrimeve për një jetë më të mirë nga ndonjë grup kriminal, por mund të ketë përfunduar e trafikuar./Javanews/a.m.
