Shqiptari Dorian Puka ka marrë sërish vëmendjen e mediave britanike, pas një video të postuar në rrjetet e tij sociale duke festuar Vitin e Ri.
I dënuar dy herë për grabitje banesash dhe i dëbuar dy herë nga Britania, The Telegraph shkruan se hajduti shqiptar, i cili nuk mund të deportohet, ka sfiduar Ministrinë e Brendshme të Mbretërisë së Bashkuar duke postuar mesazhe për Vitin e Ri nga një klub nate në Londër.
Dorian Puka, 28 vjeç, postoi një video duke festuar Vitin e Ri në një klub nate, duke pirë shisha pranë një balerine. Duke përdorur hapur llogarinë e tij në TikTok, ai e mbyll videon treminutëshe me një foto të Big Ben-it dhe Parlamentit të Mbretërisë së Bashkuar, me mesazhin: “Gëzuar Vitin e Ri të gjithëve!… Ju uroj më të mirat!”
Kjo vjen tre muaj pasi ai postoi një seri videosh duke drejtuar një Ferrari prej 300,000 paundësh në rrugët e Londrës në llogaritë e tij në TikTok dhe Instagram, si dhe imazhe me dhjetëra ora Rolex dhe makina të tjera të shtrenjta.
Ministria e Brendshme është e pafuqishme për ta deportuar atë sepse ai ka kërkuar azil dhe zyrtarët nuk mund ta largojnë derisa çështja e tij të shqyrtohet plotësisht – një proces që mund të zgjasë muaj, në mos vite, për shkak të numrit të madh të ankesave në gjykatat e imigracionit.
Fillimisht, Puka u burgos për nëntë muaj në vitin 2016 dhe më pas u deportua në 2017 pas një tentative për të hyrë me forcë në një pronë, kur pronari e pa në kamerën e sigurisë ndërsa ishte me pushime në Francë.
Megjithatë, brenda një viti, ai arriti të shmangte kontrollet kufitare dhe u kthye në Mbretërinë e Bashkuar, ku kreu një seri vjedhjesh në zonat periferike të Londrës. Puka u kap përfundimisht duke mbajtur një orë të shtrenjtë që kishte vjedhur, pasi u dallua nga oficerë me rroba civile që patrullonin në Surbiton, në jugperëndim të Londrës. Ai u burgos për tre vjet e gjysmë dhe më pas u deportua në mars 2020.
Gjatë kohës që ishte në burg në Mbretërinë e Bashkuar, ai u bë i njohur për përdorimin e një telefoni të paligjshëm të futur kontrabandë, duke postuar foto në Instagram pranë liderit të një grupi të organizuar kriminal, i cili po vuante një dënim 12-vjeçar për shpërndarje kokaine dhe pastrim parash.
Pas kthimit në Shqipëri për disa muaj, ai udhëtoi përmes Gjermanisë, Belgjikës dhe Holandës përpara se të kalonte kontrollet kufitare dhe të hynte përsëri në Britani në dhjetor 2020, sipas llogarisë së tij në Instagram.
Kuptohet se ai ka paraqitur një kërkesë për azil dhe është në liri me kusht imigracioni, duke mbajtur një byzylyk elektronik që nga viti i kaluar, ndërsa pret që një gjykatë imigracioni të vendosë për kërkesën e tij.
Përveç videos me Ferrarin, ai ka postuar foto dhe video nga pushimet e tij në hotelin Carbis Bay pranë St Ives në Cornëall, duke përfshirë shëtitjet në plazh me byzylykun në këmbë.
Burimet e tij financiare mbeten të panjohura, por raportet shqiptare sugjerojnë se ai ka qëndruar në një apartament me dy dhoma gjumi prej 250,000 paundësh në Hounsloë, në perëndim të Londrës.
Një zëdhënës i Ministrisë së Brendshme tha: “Të huajt që kryejnë krime nuk duhet të kenë asnjë dyshim se ligji do të zbatohet. Z. Puka është deportuar më parë nga Mbretëria e Bashkuar. Sipas ligjit të Mbretërisë së Bashkuar, ne nuk mund të deportojmë individë kur ka pretendime ose përfaqësime që presin vendim.
“Ne kemi filluar tashmë një rritje të madhe të zbatimit të imigracionit dhe aktiviteteve të kthimit për të larguar njerëzit që nuk kanë të drejtë të jenë në Mbretërinë e Bashkuar, me 3,000 të larguar që nga ardhja e qeverisë së re në pushtet.”
Chris Philp, sekretari i brendshëm në hije, tha: “Ky kriminel i dënuar dhe i përsëritur duhet të deportohet menjëherë. Çdo kërkesë për azil duhet të shqyrtohet në mënyrë të përshpejtuar.
“Prioriteti më i lartë i qeverisë duhet të jetë largimi i kriminelëve që abuzojnë me sistemin tonë. Ky njeri po tallet me sistemin tonë. Sekretari i Brendshëm duhet të ndërhyjë për të siguruar që ky kriminel të largohet.”
