Policia e Tiranës ka arrestuar dy persona pasi njëri prej tyre ishte në kërkim, i dënuar për drogë dhe tjetri që i la në përdorim banesën, duke e ndihmuar të fshihej.
Burime policore bëjnë me dije se janë arrestuar Hajri Mamica, 34 vjeç dhe Françesko Rrapushi, 26 vjeç, të dy banues në Kamëz.
Mamica ishte person i shpallur në kërkim për veprën penale prodhim dhe shitje lëndësh narkotike, për të cilën Gjykata e Apelit Tiranë e ka dënuar me 5 vite burg.
Në sajë të informacioneve të marra në rrugë konfidenciale 34 vjeçari u kap nga shërbimet e Policisë në zonën e Bathores, ku gjatë kontrollit fizik të ushtruar iu gjetën 26.6 gramë lëndë narkotike e dyshuar e llojit kanabis sativa dhe një krehër pistolete brenda të cilit kishte 6 fishekë model 56.
Gjithashtu u arrestua dhe Rrapushi i cili i kishte lënë në përdorim banesën, ku gjatë kontrollit të ushtruar u gjet lëndë narkotike.
26 vjeçari i kishte lënë në përdorim shtëpinë që kishte marrë me qera shtetasit Hajri Mamica, ku gjatë kontrollit të ushtruar janë gjetur 867.8 gramë lëndë narkotike e dyshuar e llojit kanabis sativa, krehër pistolete me 6 fishekë model 56 dhe 4 aparate celularë.
Materialet iu referuan Prokurorisë së Rrethit Gjyqësor Tiranë në ngarkim të shtetasit H. M., për veprat penale “Prodhim dhe shitje të lëndës narkotike”, “Prodhim dhe mbajtja pa leje e armëve dhe municionit luftarak”, dhe për veprën penale “Përshtatja e lokalit për përdorim droge”, në ngarkim të shtetasit F. Rr./a.m.
