Një inspektor i Patrullës së Përgjithshme në Vlorë është arrestuar nga Agjencia e Mbikëqyrjes Policore, pas një telefonate në sallën operative që raportonte sjellje të papërshtatshme nga ana e tij.
Sipas informacionit zyrtar nga AMP, mbrëmjen e kaluar një shtetas njoftoi se dy punonjës policie e kishin ndaluar në zonën e Ujit të Ftohtë, duke u prezantuar me sjellje jo etike. Pas verifikimit të situatës, inspektori H. I. u testua me matësin e alkoolit, ku rezultoi me një masë prej 0.82 mg/l, për të cilën u ndërmor arrestimi në flagrancë.
Njoftimi i AMP:
Agjencia e Mbikëqyrjes Policore (Rajoni Vlorë – Gjirokastër) ka arrestuar në flagrancë punonjësin e policisë Inspektor H. I., me detyrë Oficer i Patrullës së Përgjithshmë në Komisariatin e Policisë Vlorë, i dyshuar për kryerjen e veprës penale “Drejtim i automjetit në mënyrë të parregullt” parashikuar në nenin 291 të Kodit Penal.
Arrestimi i tij u krye pas telefonatës së një shtetasi në sallën operative mbrëmjen e djeshme, i cili pretendon se dy punonjës policie e kanë ndaluar në zonën e Ujit të Ftohtë, duke u prezantuar me një sjellje jo etike. Pas verifikimit me testin matës së alkoolit, punonjësi H. I., ka rezultuar pozitiv në masën 0.82 mg/l.
Ndaj punonjësit të policisë E. A., me detyrë Oficer i Patrullës së Përgjithshme në Komisariatin e Policisë Vlorë, do të vijojë procesi i hetimit disiplinor.
