Nëse brenda institucionit që drejton futbollin në vendin tonë, FSHFsë, ekzistojnë persona me njohuri të mjaftueshme mbi kompetencat juridike institucionale, ata individë duhet të jetë turpëruar sot nga skandali i radhës që ka prodhuar Komisioni i Disiplinës. Në mënyrë të pashpjegueshme dhe sigurisht të pakuptueshme për çdo person që ka njohuri të mjaftueshme juridike, Disiplina, shkalla e parë e drejtësisë sportive, ka dalë mbi vendimin e Apelit, shkallës së dytë të drejtësisë sportive.
Gjithçka ka të bëjë me dënimin e dhënë ndaj klubit të KF Korabit për të luajtur pa tifozë ndeshjet si pritës, për shkak të ngjarjeve të dhunës në sezonin e kaluar në Kategorinë e Parë. Nga ana njerëzore, një vendim i tillë është mëse i kuptueshëm, pasi skuadra e Korabit e meriton të jetë pranë tifozëve të saj të zjarrtë dhe qyteti i Peshkopisë e meriton gjithashtu t’i gjendet pranë ekipit. Por nga ana juridike, ky është palaçollëku i radhës i një organi të drejtësisë sportive në vendin tonë, i cili duke mos pasur askënd që ta kontrolloje apo ta kthejë në rrugën e drejte, vazhdon e funksionon sipas interesave apo humorit të momentit.
Korabi u dënua më 11 maj të vitit 2016 nga Komisioni i Disiplinës për të mos zhvilluar ndeshje në stadiumin e qytetit të vet. Më datë 1 qershor, Komisioni i Apelit në FSHF, la në fuqi dënimin në 15 ndeshje si pritës pa tifozë të dibranëve.
Pas këtij vendimi, si shkallë juridike e radhës mbetej vetëm Gjykata Administrative Sportive (CAS) ose falja nga një vendim i Komitetit Ekzekutiv, i cili në të kaluarën ka marrë kompetenca të tilla dhe nuk do ta kishte të vështirë të falte dibranët. Por sot, Komisioni i Disiplinës, ka dalë me një vendim absurd që thyen logjikën juridike. KDS vendosi “Pranimin e kërkesës së KF “Korabi”. Pezullimin e pikës 8 të Vendimit Nr.16 date 11.05.2016 të Komisionit të Disiplinës, duke lejuar KF Korabi, që të zhvillojë ndeshjet si pritës me tifozë. Në rast përsëritje të çfarëdo incidenti, pa përjashtuar vendimet e tjera eventuale, fillon ekzekutimi i vendimit të pezulluar”
Sigurisht, nëse një vendim i tillë do të dilte nga KAS apo Ekzekutivi i FSHF¬së, pakkush do të kishte diçka për të thënë. Por meqë kjo është FSHF dhe aty asnjëherë nuk bëhen gjërat siç duhet, festa e tifozerisë dibrane për kthimin pranë skuadrës së zemrës kthehet detyrimisht në një prej skandaleve më të mëdha që ka prodhuar ky institucion i cili gjen gjithmonë një mënyrë të re për të tejkaluar bëmat e mëparshme me absurditete të tilla.
PanoramaSport/d.i.
