Nga Drini Kuqo*
Dhe negociatat dështuan! Pak shqiptarë në fakt kishin menduar se më të vërtetë dy të huajt, pavarësisht kredencialeve të tyre mund të na bënin derman, por tashmë skenari është bërë i qartë: Partia Demokratike nuk do të hyjë në zgjedhje.
Fill pas dështimit të “shumëpritur”, Lulzim Basha doli përpara kamerave për të thënë një fjalë që gjatë të gjithën i druhen: Përshkallëzim protestash!
E gjithë kjo, për Partinë Demokratike bëhet në emër të popullit. Por, cilit popull? Përtej faktit që në ditët e saj më të mira, çadra me zor kalon 100 pjesëmarrës, shqiptarët, pavarësisht bindjeve të tyre politike bëhen të gjithë bashkë kur vjen çështja tek rreziku i destabilitetit apo tek vetingu.
Sondazhet tregojnë në mënyrë të pabesueshme se 99% e shqiptarëve duan që vetingu të bëhet sa më shpejt. Nga ana tjetër, askush nuk dëshiron që vendi të rikthehet në humnerën e vitit 1997, askush, sado i varfër që të jetë nuk dëshiron që të shohë fëmijët e tij duke u vrarë rrugëve të vendit për të mirën e Lulzim Bashës.
E kur vjen fjala tek destabiliteti, shqiptarët kanë një përfytyrim që shumë pak kombe të tjera moderne e kanë. Destabiliteti tek ne nuk është ai që mediat franceze denoncojnë në rast të fitores së Le Pen dhe as ai që përpara francezëve denonconin amerikanët në zgjedhjet e nëntorit. Për shkak të historisë sonë të përgjakshme, destabiliteti këtu është një fjalë që të rrënqeth, të zhvesh nga çdo arsye, e që të bën që çdo qelizë e trupit të rreshtohet kundër.
Secili prej nesh, njeh socialistë e demokratë. Pyesni veten, cili prej tyre do të ishte i gatshëm të sakrifikohej në emër të Bashës apo të Ramës? Për shumë prej nesh, kjo politikë primitive është vetëm një barrë. Mirë që nuk zgjidh asnjë hall, por na vihet edhe kundër, duke na kërcënuar edhe atë pak gjë që secili ka ndërtuar me shumë mund.
Destabilitet, por në emër të kujt? Në emër të gruas së Bashës, që brenda dy vitesh shiti dhe bleu dy apartamente. Në emër të vjehrrit të Bashës, njeriut që i “ra nga qielli” një biznes fitimprurës ndërtimi? Në emër të kunatit, që plotësonte çdo kusht për të fituar tendera të Bashkisë së Tiranës apo në emër të Erlind Bashës, të vëllait, që dha dorëheqjen nga Gjykata e Lartë sapo nisi procesi i vetingut?
Unë, nuk do të vritem për asnjë prej tyre! Të jesh i sigurt Lulzim, askush prej nesh nuk do të vritet për ty. Opozita është titull që fitohet duke dalë “nënkampion”, duke u renditur i dyti. Në 18 qershor, kur ti të mos jesh fare në atë listë, opozitë do të jetë dikush tjetër, ndërsa ti, atëherë s’do të kesh më as të drejtën morale të na zësh bulevardin e të na kërcënosh me luftë. Në 18 qershor, ti zgjodhe të jesh askushi!/Lexo.al
