Në Egjipt lind “ciklopi”
Fotoja e një fëmije të sapolindur me një sy të vetëm është shpërndarë me shpejtësi në rrjet, ndërsa komentet kanë qenë pothuajse të gjitha paralelizime me ciklopin e mitologjisë. Fëmija mendohet se vuan nga cyclopia, një nga defektet më të rralla të lindura. Zakonisht fëmijët që lindin me këtë defekt, vdesin brenda pak minutash.
Sipas faqes saudite slaati.com, doktorët janë shprehur se ky deformim mund të jetë pasojë e kombinimit të disa ilaçeve që ka marrë e ëma apo ndonjë ekspozimi të mundshëm ndaj rrezatimit. Mamaja e fëmijës është një egjiptiane, e cila e ka sjellë në jetë në një spital privat në qytetin El Senbellawein.
Dr Ahmed Badruddin, i cili ndjek gjendjen shëndetësore të fëmijës, thotë se ai ka një kokë plot flokë, veshë të mëdhenj dhe deformime të tjera në trup. Një foto e tij është shpërndarë nga familja, e cila në vend që të urohej, po ngushëllohet. Mjekët thonë se jeta e tij nuk mund t’i kalojë disa ditë.
