Nga Armando Meta
Fushata në Dibër, për kryetar Bashkie, ka zbardhur edhe disa elementëtë, të cilët edhe i japin seriozitet, por edhe e bëjnë pak qesharake investimin e forcave politike në këtë fushatë. Kjo dukuri vihet re si sa i përket aspektit të premtimeve elektorale, por nga ana tjetër edhe të shpërfaqjes së dy kryetarëve të partive më të mëdha për të vënë theksin se do të jenë kryeministrat e sotëm apo të ardhshëm të vendit.
Vetëm pak ditë më parë kryeministri Rama nuk ngurroi ta nënvizonte këtë fakt duke theksuar se ai do të jetë kryeministër deri sa të mbarojë Rruga e Arbrit. Për hirë të së vërtetës ajo rrugë ka 10 vite që është nisur dhe s’ka përfunduar dhe duke marrë parasysh ritmin e punimeve të këtij projekti ka pak gjasa që ajo të mbarojë edhe pas 20 vitesh. Thënë thjeshtë Rama e sheh veten kryeministër edhe për 5 mandate të tjera.
Ndërkaq as Basha s’ka ngelur pas në vetëdeklarimet e tij se do të jetë ai kryeministër duke e kujdesur më shumë që të shpërfaqë këtë dëshirë të tij sesa të nënvizopjë rëndësinë e fitores së kandidatit të PD-së për bashkinë e Dibrës, Shehu. Në fakt zgjedhjet në Dibër, në pikëpamjen e hartës elektorale në vend, nuk kanë asnjë lloj rëndësie. Ato janë thjeshtë në interes të qytetarëve dibranë që të kenë një qytet më të mirë, rrugë më të mira, kopshte e shkolla më të mira, ujë dhe shërbime të tjera. Në shkallë kombëtare ato s’kanë pikë vlere. Një banori në Tiranë, Shkodër, Vlorë apo Korçë, as që ju intereson fare rezultati i atyre zgjedhjeve, pasi ato nuk ndikojnë aspak në jetët e tyre. Ne duhet të mësohemi me këtë logjikë që zgjedhjet vendore, janë thjeshtë në interes të atij komuniteti ku bëhen zgjedhjet. Kaq.
Natyrshëm në sfondin e zhvillimeve politike në vend, dy forcat e mëdha po përpiqen t’u japin këtyre zgjedhjeve një theks sa më politik, a thua se pas 11 shtatorit pritet që bashkë me fituesin e zgjedhjeve në Dibër të bie dhe qeveria apo të forcojë pozitat qeveria. Ky stil fushate është thjeshtë qesharak. Të shfrytëzosh një palë zgjedhje për një bashki të një qyteti thjeshtë si platformë se cili do të jetë kryeministri i ardhshëm, vetëm me dibranët nuk ka lidhje. Kjo i ka vënë në pozitë pak të sikletshme edhe vetë kandidatët për kryetar bashkie, të cilët nuk ngurrojnë të deklarojnë dhe nëpër lagje apo shkallë pallati për kryeministrin e sotëm apo të ardhshëm që do të mbështes Dibrën.
E dimë shumë mirë që Basha do që të bëhet kryeministër dhe se Rama do edhe mandate të tjera si kryeministër. Por si Rama ashtu edhe Basha nuk kanë kuptuar se kjo propogandë jo vetëm po sekëlldis dibranët, por po na bezdis dhe ne të tjerëve, të cilët nuk jemi banorë të Dibrës. Të dy partitë kanë çuar një taborr me njerëz për këtë fushatë sa duket si një betejë për jetë a vdekje. Në fakt thjeshtë po na e shpifin. Duke parë mënyrën sesi po zhvillohet fushata në Dibër po na duket se aty po garojnë për kryeministra Basha përball Ramës dhe jo Shehu përballë dr. Ramës për kryetar Bashkie. Dibranët janë njerëz serioz e plot me humor. Ata nuk e meritojnë të bëhen qesharak.