Që prej 4 ditësh tashmë, Arben Ahmetaj mund të cilësohet si ISH-Ministri i Ekonomisë, por ende jo, Ministri i Financave të qeverisë, pasi letrat për dekretimin e tij ende nuk janë vulosur nga Presidenti Nishani. Ditën e djeshme Ahmetaj, përveç përplasjeve me Ish kryeministrin Berisha, mbajti dhe një fjalim në aulën e parlamentit, mbi marëveshjen e qeverisë shqiptare me FMN-në, për marrjen e një kredie prej 72.4 milionë eurosh.
Një fjalim që për shumëkënd do duhej të vinte nga tashmë deputeti Shkëlqim Cani, i cili dhe ka kryesuar takimet dhe negociatat si de facto, ish Ministri i Financave.
Në këto kushte, pyetja më e thjeshtë që mund të ngrihet është: Në çfarë pozitash foli dje Arben Ahmetaj?
Siç dihet, Ahmetaj nuk është më as deputet i Partisë Socialiste, pasi ka lënë mandatin që në shtator të viti 2013 për tu bërë Ministër i Ekonomisë, post të cilin nuk e gëzon më prej të paktën 3 ditësh që nga dalja e dekretit të Nishanit.
