Gjatë mbledhjes së sotme të Këshillit Bashkiak, kryetari i Bashkisë së Tiranës, Erion Veliaj komentoi fushatën e kundërshtarëve politikë, kur tha se kanë tre-katër ditë që rrinë vetëm në zyrë e bëjnë video, e nuk dalin në asnjë aktivitet.
“Ka ca ditë që nuk dalin nga zyra, që kur ndodhi ajo vakia në stadium, që e nxorën atë pensionistin vetëm duke u folur karrigeve. Ka tre-katër ditë që rrinë vetëm dhe bëjnë video nëpër Tik-Tok. Duhet me u thënë, dilni në fushatë se është shumë e rëndësishme të bëjmë debat. Duket sikur po kalojnë të tretat e stadiumit dhe po e trajtojnë si një vaki. Domethënë, të tretat, të shtatat, imagjino kur të vijnë të dyzetat e atyre. Është turp të identifikohesh me Saliun dhe Ilir Metën, dy kufoma, dy vjetërsira, dy rraqe, dy rrënoja morale të vendit tonë. Këta që janë kandidatët duhet të dalin pak nga shtëpia se kaloi vakia tani. Ndodhi çfarë ndodhi. Kishte më shumë njerëz për Ilir Metën se për Sali Berishën. Çfarë turpi për ta mbyllur karrierën në atë moshë”, tha Veliaj.
Ndër të tjera, kryebashkiaku Veliaj bëri me dije disa investime që do bëhen në Tiranë. “Jemi duke punuar dhe do ju vijmë me propozime edhe për atë që duam të bëjmë me stadiumin “Selman Stërmasi” dhe me pallatin e Sportit “Asllan Rusi”. Bashkia e mori një vendim për parkun e sportit “Dajti”, që është te Universiteti i Sporteve, dhe besoj do të jemi në fazën e apelimit të konkurrentëve për të parë kush është fituesi dhe për të filluar punën atje. Bëhet fjalë për të krijuar një pol edhe të Njësia 5, ku edhe “Sport Club Tirana” dhe “Futboll Club Tirana” të kenë ambientet e tyre. Gjithashtu, një projekt që na ka ardhur në minutë të fundit, bëhet fjalë për emërtimin e rrugës ‘István Schütz’, një albanolog i shquar hungarez. Ne kemi një raport të shkëlqyer me Hungarinë, që nga koha e Skënderbeut, dhe ne si Bashki e Tiranës, asistencën tonë kryesore e marrim nga Ujësjellësi i Budapestit. Na ndihmuan të dilnim nga falimenti. Na ndihmuan ta kishim ujin më të lirë se sa në Kamëz, kur drejtohej nga PD”, sqaroi Veliaj.
Veliaj jep lajmin e mirë: “Miratuam sot hapjen e çerdhes dhe kopshtit të parë në Astir”
Kryetari i Bashkisë së Tiranës, Erion Veliaj ka dhënë sot lajmin e mirë të hapjes së një çerdheje dhe një kopshti në Astir, si dhe dy institucioneve të tjera të arsimit parashkollor në Ndroq. Ai tha se fakti që në Astir, në zgjedhjet e fundit, PS mori mbi 60% të votave, është përgjigja më e mirë për opozitën.
“Bëhet fjalë për të hapur dy institucione për vogëlushët tanë, njëra është në Astir, në lagjen 14, do të jetë çerdhja e kopshti i parë për atë komunitet. U them edhe këtyre shokëve tanë që kemi përballë, ka një arsye pse na voton Astiri në mbi 60%, se Astiri me të drejtë thotë këta që bënë 40 shkolla bëjnë edhe 44, këta që bënë 100 rrugë bëjnë edhe 101. Ata që s’kanë prek gjë me dorë e na lanë pa rruge, pa kanalizime e pa arsim, e sigurt që nuk nxjerrin dot qimen nga qulli. Ndërsa, çerdhja tjetër do të hapet në Ndroq, numri i fëmijëve në Astir do të jetë 326 fëmijë, në Ndroq 41,” deklaroi Veliaj në mbledhjen e sotme të Këshillit Bashkiak./m.j
