Analisti Mustafa Nano në një intervistë për gazetën “Panorama”, komenton deklaratat e deputetes së PD-së Majlinda Bregu e cila kohët e fundit ka ngritur tonet e kritikës brenda grupit të saj parlamentar, ndërsa disa ditë më parë në një intervistë televizive tha se PD ishte më mirë në kohën dhe Sali Berishës dhe se zgjedhje e Lulzim Bashës në krye të partisë ishte një gabim.
I pyetur nëse sot, pas tri vitesh, a ishte e drejtë thirrja e tij për “bashkimin e qelbësirave” për të hequr me çdo lloj çmimi Berishën nga pushteti, Nano shprehet kështu:
“Absolutisht, po! Është një nga gjërat më me mend që kam thënë ndonjëherë. Sikur të më thoshin se po krijohet një arkiv i veçantë, që do të ruhet për shekuj me radhë, ku secili prej atyre që kanë mbajtur qëndrime publike, do të duhet të zgjedhë vetëm një qëndrim për ta futur në këtë arkiv, dhe sikur të më kërkonin edhe mua të zgjidhja një qëndrim timin për këtë arkiv, unë do të zgjidhja pikërisht këtë qëndrim.
Mua më vjen keq që ka ende shqiptarë që nuk e kuptojnë se në vitin 2013 ka ndodhur një gjë e madhe. Një gjë fantastike. Kemi larguar nga drejtimi i një vendi një motherfucker. Më vjen keq edhe që në shoqërinë shqiptare ka një kompleks subordinimi kur vjen puna te qëndrimi ndaj tij.
Shikojeni se ç’ndodh! Ka tre vjet që ka humbur zgjedhjet, që i ka humbur ato në mënyrë spektakolare, ka tre vjet që bën si gore në Parlament, ka tre vjet që mban peng partinë demokratike dhe askush nuk i bën dot as kritikën më minimale. Të gjithë i qurraviten, deputetët, aparatçikët e Partisë Demokratike, kryetari i PD-së po se po, gazetarët që e kanë për zanat t’i atashohen partisë, por edhe gazetarë që mbahen me të madh si opinionistë nacionalë.
Dhe jo vetëm kaq. Edhe kritikët e lidershipit të Partisë demokratike nuk mungojnë t’i përcjellin herë pas here sinjale dashurie e solidariteti. Majlinda Bregut nuk i erdhi asnjë çikë turp kur na kujtoi këto ditë se ajo kish qarë kur Berisha ka dhënë dorëheqjen. Edhe hajde prit hair nga Majlinda!
Të vjen për të vjellë nga këta njerëz. Për dëmet që i ka bërë vendit ky njeri do të flitet mirë kur ai të qërohet nga politika. Atëherë do të flasin edhe ata që s’kanë gojë sot. Por për ta njohur se kush është, nuk ka nevojë të presësh kaq shumë. Nuk ka nevojë as të dish se ç’ka bërë. Është mjaft ta shohësh në Parlament një ditë të enjte dhe ti e kupton se kush është”, tha Nano.
Ja çfarë tha Majlinda Bregu pak ditë më parë:
Vazhdoni të mendoni se PD do ishte më mirë me kryetar Sali Berishën?
E kam menduar.
Dhe a je përlotur kur Berisha dha dorëheqjen?
Po.
A ke menduar shpesh që zgjedhja e Bashës kryetar i PD-së ka qenë gabim?
E kam menduar. Kam votuar për Sokol Olldashin./panorama/a.k
