“Në 11 Maj të marrim rezultatin më të mirë”, Rama: Pasaporta e BE do t’i japë dinjitet shqiptarëve

Kryeministri Edi Rama në takim me kandidatët për deputetë të Partisë Socialiste të Qarkut të Tiranës u shpreh se duhet të bëjnë çmos që në këto zgjedhje të marrin rezultatin më të mirë të të gjithë fitoreve që PS ka pasur.

Rama ndër të tjera u ndal edhe tek pasaporta evropiane për të cilën tha se me marrjen e saj pas integrimit në BE do të mundësojë kthimin e dinjitetit të shqiptarëve ku do të jenë të barabartë me qëtetarët evropian.

“Sot tek barazia para ligjit e kemi shumë të qartë kërcënimin. Jemi udhëheqës të reformës në drejtësi dhe bartës të kostove të këtij procesi dhe përballë nesh janë forca që duan votën për të kthyer përmbys gjithçka që është ndërtuar deri tani.

Nga ana tjetër po kaq konkrete është mundësia që çdo shqiptar të pajiset me pasaportën evropiane të Shqipërisë. Pasaporta e BE buron nga hyrja në BE, ne duhet të bëhemi anëtarë që të marrim pasaportën dhe për çdo shqiptar është transformimi i plotë i jetës. Pasaporta e BE i jep çdo shqiptari atë që se ka pasur, dinjitetin e barabartë nën qiellin e përbashkët të Europës. I jep statusin që të mos shihet si qytetar i dorës së dytë. Bën një dallim të madh në shumë aspekte. I jep mundësinë çdo shqiptari, që kur të jetë në aeroport, të hyjë pa ndaluar përballë një polici, thjesht duke treguar pasaportë dhe të punojë ku të dojë nëse gjen mundësi për punë. Por edhe të jetë nën kujdesin e shërbimin shëndetësor. Por nga se rrezikohet kjo? Ky është një moment në histori dhe një dritare e hapur dhe një tren që është para nesh në stacion dhe ka ndaluar në një kohë të caktuar dhe koha është 2027. Negociatat nuk janë as komente në Facebook, as analiza, por janë një punë për të qëruar oriz në çdo ligj, nen, sektor dhe për të vërtetuar që çdo gjë që thuhet bëhet. Janë 40 skuadra nga pushteti ekzekutiv e gjyqësor të angazhuar për negociatat dhe asnjë çoroditje nuk duhet lejuar të ndodhi. Kjo është përtej të gjithave dhe prandaj 11 Maji duhet të jetë vula për t’i thënë kësaj skuadre vazhdoni punë se drejtimi nuk lëviz dhe gjërat siç janë parashikuar ..Ky është një moment ku çdo shqiptar duhet ta kuptojë që është pjesë e këtij procesi me votën e vet.

Dhe në fund të këtij procesi rezultati i parë konkret do të jetë marrja e pasaportës evropiane ku do të jetë secili i lirë në perimetrin evropian. Me hyrjen tonë në BE Shqipëria bëhet sa Europa dhe Europa bëhet sa Shqipëria. Këto janë zgjedhjet e 11 Majit në thelb dhe për këtë arsye ne duhet të bëjm çmosin që në këto zgjedhje të marrim rezultatin më të mirë të të gjithë këtyre fitoreve. 9 rradhazi. Në 11 Maj kemi rradhën e 10 dhe do të marrim një fitore me notën 10 duke filluar nga Tirana ku qielli do të jetë kufiri”, thekson Rama.