Ligji i ri për turizmin që u votua në Kuvend me votat e mazhorancës socialiste ka pësuar disa ndryshime të fundit që prek të gjithë individët që japin apartamente me qira në platforma online.
Detyrimin për t’u regjistruar në QKB, do ta kenë vetëm sipërmarrësit që kanë bllok apartamentesh. Ekspertët mendojnë se kjo lehtëson tregun
Ligji i ri për turizmin fokusin kryesor ka formalizimin e atij që po shndërrohet në një nga sektorët më të rëndësishëm të ekonomisë. Kështu pritet të mblidhen të dhëna statistikore të detajuara nga strukturat akomoduese, ndërsa kush ofron këtë shërbim duhet të certifikohet dhe kategorizohet, ndryshe gjobitet.
“Mendoj që turizmi është ndër sektorët që ka më shumë informalitet në vend sepse një pjesë e madhe e tregut 30-40% nga shifrat paraprake dominohet nga njësitë e vogla që zotërohen nga një individ që normalisht duke mos qenë të regjistruar, duke mos qenë të deklaruar ne nuk e dimë dhe çfarë shërbimi ofrohet apo sa të kënaqur janë aty, sepse ne duam të zhvillojmë një turizëm të qëndrueshëm dhe jo të përjetojmë një bum, që më pas na kthehet mbrapsht”, tha Tola.
Edhe pse vjet erdhën 10 milionë turistë në vendin tonë, strukturat akomoduese raportuan gjysmën e tyre si vizitorë, ndërsa gjatë gushtit, pikut të sezonit nuk raportohej zënia e plotë e kapaciteti, duke bërë që qeveria ndryshojë ligjin për herë të parë nga 2015-ta për të adresuar informalitetin./m.j
