Këshilli i Ministrave ka miratuar një paketë ndryshimesh financiare që prekin zhvilluesit e pronave dhe kompanitë e ndërtimit që aplikojnë pranë Këshillit Kombëtar të Territorit (KKT).
Nëpërmjet një vendimi, qeveria ka shtuar shërbime të reja me pagesë dhe ka saktësuar formulën e tarifimit për rishikimin e lejeve të zhvillimit.
Tarifa e re për “karabinanë”
Një nga risitë kryesore të vendimit është vendosja e një tarife specifike për një shërbim të ri: pajisjen me vërtetim për përfundimin e strukturës së objektit.
Sipas vendimit, tarifa për shqyrtimin e kërkesave për lëshimin e “certifikatave për përfundimin e punimeve të karabinasë” do të jetë fikse, në masën 300,000 (treqind mijë) lekë.
Vendimi sjell qartësi edhe për kostot që duhet të paguajnë subjektet kur kërkojnë të ndryshojnë apo rishikojnë një leje zhvillimi ekzistuese. Tarifat ndahen në dy kategori, në varësi të ndryshimit të sipërfaqes së ndërtimit.
Pa shtesë sipërfaqjeje
Nëse kërkesa për ndryshimin e lejes bëhet brenda kufirit të miratuar më parë (pra nuk shtohet sipërfaqe ndërtimi, ose ka zvogëlim të saj), zhvilluesi do të paguajë një tarifë fikse prej 300,000 lekësh.
Me shtesë sipërfaqjeje
Nëse rishikimi i lejes shoqërohet me rritje të sipërfaqes së përgjithshme të pronës, llogaritja bëhet e kombinuar: Paguhet tarifa fikse prej 300,000 lekësh, plus një vlerë prej 100 lekësh për çdo metër katror shtesë.
Tarifat për situacionet përfundimtare
Qeveria, në vendim, ka saktësuar edhe pagesat në fazën përfundimtare të investimit. Në rastet kur vlera e situacionit përfundimtar të punimeve është e njëjtë ose më e vogël se preventivi fillestar i deklaruar, tarifa e shërbimit do të jetë fikse: 500,000 (pesëqind mijë) lekë. E njëjta tarifë aplikohet edhe për rastet e certifikatave të veçanta të përdorimit.
Këto ndryshime hyjnë në fuqi menjëherë dhe Agjencia e Zhvillimit të Territorit (AZHT) është ngarkuar të lëshojë faturat me tarifat e reja për të gjitha vendimmarrjet e KKT-së që do të nënshkruhen pas hyrjes në fuqi të këtij vendimi.
