Disa futbollistë në botë kanë ndërruar ekip përfaqësues dhe shqiptarët këtë e dinë më së miri, pasi ka plot shembuj që njëherë kanë luajtur për ngjyrat kuqezi, pastaj me Kosovën.
Por nëse më parë jemi mësuar me lojtarë shqiptarë që nuk e kanë shumë të qartë Kombëtaren që do të përfaqësojnë, Shaban Zenku është rasti më ekstrem.
Ky lojtar ka ndërruar 3 përfaqësuese në vetëm 10 muaj. E nisi te Kosova, e vazhdoi te Shqipëria dhe pritet që ta përfundojë te Maqedonia e Veriut.
Mbi këtë rast ka shkruar edhe media serbe, “Kurir”, duke u tallur me rastin në fjalë: “Ka hyrë në historinë e futbollit europian, në mos në librin “Guinnes”, shkruhet nga media serbe për lojtarin e Borussia Monchengladbach.
I lindur në vitin 2004, 18 vjeçari nga Kërçova e Maqedonisë së Veriut, karrierën e tij është duke e zhvilluar tek skuadra e njohur gjermane, Borussia Monchengladbach U19.
Ai filimisht u grumbullua me Kosovën U18, pastaj kaloi tek Shqipëria U18 dhe në fund iu bashkua Maqedonisë së Veriut U19, një rast shumë interesant që pothuajse nuk ka ndodhur tek asnjë futbollist shqiptar.
Që në ndeshjen e parë me kombëtaren e tij të re, ai e gjeti rrugën e golit. Zenku shënoi një gol të bukur në fitoren me përmbysje ndaj Qipros.
Më pas, ai tha se ka kaluar kohë të bukur, por të shkurtër tek Kosova. Megjithatë, sipas tij është ndryshe të luajë për Maqedoninë e Veriut, kjo për faktin se vjen nga Kërçova.
Kujtojmë se Zenku është pjesë e futbollit evropian në nivel klubesh për vite të tëra dhe pritet mjaft nga ai në të ardhmen, duke parë edhe cilësitë që posedon.
/f.s
