Ndryshimet në Qeveri, ja kush janë deputetët socialistë që kërkojnë poste ministrore
“Qeveria Rama” ka arritur tashmë në gjysmën e mandatit të saj. Që prej shtatorit të 2013-s kur qeveria aktuale nisi nga puna dhe deri më tani, kryeministri Edi Rama ka bërë vetëm dy lëvizje në kabinetin e tij, edhe këto thuajse të detyruara. Ndryshimi i parë erdhi për shkak të dorëheqjes të Ilirjan Celibashit dhe vendin e tij e mori Ermonela Felaj, ndërsa Erion Veliaj dha dorëheqjen nga posti i ministrit të Mirëqenies Sociale pas kandidimit në garën për Bashkinë e Tiranës. Por tashmë me nisjen e sesionit të ri parlamentar kanë nisur të qarkullojnë sërish zëra që kërkojnë ndryshime në qeveri. Deputetë të Partisë Socialiste, por edhe aleatët e socialistëve, kanë nisur të artikulojnë nevojën për ndryshime në kabinetin “Rama”, ndërkohë që vetë kreu i qeverisë ka theksuar disa herë se nuk do të ketë ndryshime në qeveri.
Deputetët
Taulant Balla, Pandeli Majko, Arta Dade, Valentina Leskaj, Koço Kokëdhima, Paulin Sterkaj, Namik Dokle, Vladimir Kosta, Piro Lutaj, Alfred Peza, Fatmir Toçi apo edhe Fatmir Xhafaj janë disa nga deputetët socialistë të cilët i kërkojnë kryeministrit dhe kreut të partisë së tyre, ndryshimet në radhët e kabinetit që drejton. Arsyet e nevojës për ndryshime në qeveri, duket se lidhen me konsumin e tepërt të disa prej ministrave, ndërsa edhe vetë grupi parlamentar socialist ka rezerva për performancën e disa prej drejtuesve të ministrive. Nga ana tjetër, shumë prej deputetëve nuk i kanë kursyer kritikat për ministra të caktuar pasi sipas tyre kanë humbur kontaktet me bazën e partisë. Deputetët e majtë kanë folur edhe për mos hapje telefonash nga ana e ministrave të caktuar për probleme në zonat ku deputetët kanë marrë mandatin e tyre. Por jo vetëm kaq, disa prej emrave të deputetëve të mësipërm janë lakuar edhe si kandidatë të mundshëm për të marrë poste ministri dhe duket se presioni i tyre për ndryshime në qeveri lidhet edhe me zgjedhjen e tyre në këto poste.
Meta dhe Idrizi
Por krahas zëra brenda partisë, edhe aleatët e Partisë Socialiste kanë artikuluar nevojën për ndryshime në kabinetin aktual. Zëra nga Lëvizja Socialiste për Integrim pohojnë se i është kërkuar kreut të qeverisë ndryshimi i disa ministrave por që deri më tani nuk ka ndodhur. Vetë kreu i LSI-së Ilir Meta ka qenë i rezervuar në këtë pikë, pasi sa herë është pyetur për këtë çështja ka deklaruar se ndryshimet në radhët e qeverisë janë çështje që i takojnë kryeministrit Rama. Por ndryshe nga LSI, e cila është e përfaqësuar në ekzekutiv, Partia për Drejtësi, Integrim dhe Unitet e cila ju bashkua koalicionit të majtë para zgjedhjeve vendore të këtij viti kërkon që të ketë përfaqësuesit e saj në qeveri. Deri më tani, PDIU ka marrë vetëm postin e nënkryetarit të Kuvendit, post i cili mbeti bosh pas dorëheqjes së kreut të Partisë Bashkimi për të Drejtat e Njeriut Vangjel Dule. Nga ana tjetër, janë edhe disa parti të vogla të cilat i kërkojnë Ramës zbatimin e marrëveshjes së nënshkruar para zgjedhjeve. Partisë së drejtuar nga Paskal Milo i është premtuar post zëvendësministri por deri më tani asnjë prej përfaqësuesve të saj nuk është emëruar.
Paralajmërimi
Pak ditë më parë në media u publikua një email që kryeministri Rama u kishte dërguar në muajin mars ministrave të Partisë Socialiste. Në email në fjalë, Rama shprehet rezerva për sjelljen e ministrave por nuk përmende në të asnjë emër. Në mesazhin e dërguar kreu i qeverisë shprehet shqetësimin për sjelljen arrogante të ministrave ndërsa paralajmëronte se nëse nuk do të ndryshonin atëherë do të kishte largime nga radhët e kabinetit. Por gjatë një bashkëbisedimi me qytetarët në rrjetin social Tëitter në fillim të shtatorit, kryeministri Edi Rama deklaroi se nuk do të ketë ndryshime në qeveri.
