Kalifornia Jugore po përjeton zjarret më shkatërruese të dimrit në më shumë se katër dekada. Shkencëtarët kanë llogaritur se ngrohja globale ka kontribuuar në një rritje prej 172 për qind të zonave të djegura në Kaliforni që nga vitet 1970, me një përhapje të mëtejshme që pritet në dekadat e ardhshme.
Ngjarjet ekstreme të motit kanë nxitur dhe flakët në Kaliforni. Së pari, erërat e mëdha të Santa Ana rrahin flakët me shpejtësi 161 km/h, shumë më shpejt se normalja. Kësaj i shtohet edhe rikthimi i thatësirës ekstreme.
Sipas studimit të fundit, zjarret me rritje më të shpejtë janë më shumë se dyfish në frekuencë që nga viti 2001 dhe kanë shkaktuar më tepër shkatërrim sesa ato më të ngadalta dhe më të mëdha.
‘’Vatrat e verës janë zakonisht më të mëdha, ndërsa ato të dimrit janë shumë më shkatërruese sepse ndodhin shumë më shpejt”, shpjegojnë ekspertët. Ekziston një lidhje e qartë midis ndryshimit të klimës, vjeshtës e dimrit të thatë, që i shndërrojnë pyjet në lëndë djegëse për zjarret.
Këto flakë shkatërruese nuk mund të nxiteshin pa motin e thatë e të nxehtë dhe pa shpejtësinë ekstreme të erës, thuhet në raport.
Temperatura mesatare e Kalifornisë është rritur me rreth 1 gradë Celsius që nga viti 1980, duke bërë që numri i ditëve me bimësi të thatë të cënueshme nga zjarri të dyfishohet, theksojnë ekspertët.
