Nga Bajram Peçi
Ato që presim s’janë përpos se dy «shtylla» që duhet të mbajnë ngrehinën e shtetit të ardhshëm modern shqiptar: drejtësinë dhe integrimin në Bashkimin Europian. Ne shqiptarët i duam të dyja njëherësh, t’i vendosim sa më parë, nuk kemi mëdyshje, por është veto greke, që na e sjell si përcaktim për të braktisur zgjedhjen «Drejtësi».
Drejtësia, siç po e duam, për të cilën kemi vite që punojmë, është një ngjarje që përjetohet për herë të parë. E pavarur nga çfardo lloj regjimi, nga politika, nga ndikimi; e drejtë, e barabartë për të gjithë! Për këtë janë investuar administrativisht dhe financiarisht Europa dhe SHBA-ja. Strukturat e reja të saj, posaçërisht ato të hetimit, janë organizuar e përgatitur më së shumti prej tyre. Një drejtësi e këtij niveli i jep fund një epoke të gjatë (të vetmen që kemi përjetuar) arbitrariteti të sundimit feudal, të pushtimit turk, të atij mbretëror, të komunizmit dhe drejtësisë karikaturë në demokraturën berishjane. Nga kjo e fundit patëm ndihmesën kryesore për rrënimin e shtetit, që me të preku fundin. Sistemi i drejtësisë në gjithë hallkat e saj, përveç se humbi besimin e popullit te drejtësia, e korruptoi atë deri në pore, e motivuar nga pasurimi.
Bashkimi Europian ka qenë dhe mbetet një ëndërr për shqiptarët. Duke qenë gjeografikisht pjesë e saj, ne ndonjë rast faktor për jetën e saj (epoka Skënderbejane), ku botëkuptimet ideollogjike dhe dallimet fetare të komuniteteve kurrë nuk janë bërë pengesë e aspiratës europiane, presim shpresëplotë se do jemi shpejt politikisht dhe ekonomikisht pjesë përbërëse e këtij bashkimi. Për këtë, kemi përmbushur kërkesat-detyra, afatshkurtra dhe afatgjata, çka u vu në pah nga BE në mbledhjet e datave 13-14 dhjetor. Ursula von der Leyen, presidente e Komisionit Europian, sa sipër e deklaroi nga Brukseli se BE pret që të hapë sa më shpejt bisedimet për grup-kapitujt e parë me Shqipërinë. Megjithatë, Greqia ka kundërshtuar (çka pritej) dhe kërcënimet i ka përparuar në kufijt e armiqësisë, duke përdorur veton, duke e penguar këtë proces nëse nuk trajtohet çështja Beleri, një qytetar shqiptar ky, që ka kryer krimin e vjedhjes se votave përmes shit-blerjes dhe është në proces gjykimi.
Në konferencën për shtyp të mbajtur në mbyllje të takimit të unionit, Ursula von der Leyen dhe Presidenti i Këshillit Europian, Charles Michel, pyetjeve rreth kundërshtimeve të Athinës ju dhanë përgjigje që e mërzitën edhe më Athinën e zëdhënësen e saj, Katheimerini. U vu në dukje se Konferenca është pro progresit që duhet bërë në lidhje me zgjerimin dhe se shpresojnë se “vështirësive të pazgjidhura do të mund t’u gjendet një zgjidhje».
Fatmirësisht, elita jonë politike (përjashto Berishën dhe Metën, që Belerin e kanë kandidatin e tyre), presidenti Begaj dhe kryeministri Rama, Partia Socialiste në pushtet, ua ka bërë të qartë se zgjedhja e tyre është e do mbetet Drejtësia. Këtu mbyllet shpresa e politikës mbivlerësuese të vetvetes greke për një kompromis që na dëmton. Kjo zgjedhje është dhe një përgjegje për kundërmimin e egër nacionalist grek ndaj fqinjëve. Himara zotërinj, ka qenë në shekuj shqiptare e do mbetet e tillë! Bashkia Himarë e ka patur kurdoherë një përfaqësues të etnisë grekofone si kryetar bashkie dhe me siguri do ta ketë, por jo një monstër që ka përdhosur qëllimisht e me vetdije simbolet e kombit shqiptar, për të cilin është një cudi më vete se si Komisioni Qendror i Zgjedhjeve i lejoi regjistrimin?!
Eshtë më mirë, shumë më mirë, që të kemi një shtet të fortë ligjor sesa të hyjmë në Europë me një drejtësi të ndikuar, të përdorur e të përshtatur me konjukturat e ditës në kulisat diplomatike! Për më tepër, këtë nuk do ta pranonte edhe Europa, sepse pranimin e Shqipërisë në BE unioni e ka parimisht të pranueshme përpos se kur reforma në drejtësi të ketë siguruar një strukturë të të gjitha hallkave të sistemit në përputhje me demokracinë europiane.
Kancelari i Gjermanisë, Olaf Scholz, pakënaqësinë e kundërshtimit grek, pse jo, e nënçmoi, kur iu tha se «Bashkimi Europian duhet të bëhet më i përshtatshëm për të ardhmen». Micotaqis, që pa se po i heqin armën veto nga krahu, u ndje me siguri keq kur kancelari shprehu projektin e përgatitur me Francën për t’u hequr vendeve si Greqia, Bullgaria apo Hungaria e çdo kujt tjetër (në minoritet) të drejtën e përdorimit të vetos për politika të dëmshme nacionaliste. Duke i çarmatosur kësisoj, nuk është thjesht puna se u shfryjnë megallomaninë, por i ulin me këmbë në tokë si siguri për paqen dhe harmoninë në rajon.
Kur sheh dhe lexon komentet e shtypit grek se, mes të tjerash, bëjnë sikur vlerësojnë Edi Ramën që gjithësesi ai «…po e mbron Shqipërinë nga islamizmi», s’mund të mos buzëqeshësh me naivitetin e ortodoksisë mesjetare greke! Duhet të vijnë të shohin e prekin fizikisht vendin tonë për të parë se mes ne shqiptarëve besimi fetar i kujdo nga tre fetë e lira për besim dhe ushtrim, asnjë prej tyre nuk del nga përkushtimi për kombin, nga krenaria e të qenit shqiptar.
Fqinj të dashur, futeni pallën në mill, marrëzitë e juaja u bënë bajat dhe nuk i pëlqejnë me Europës!
