Agjencia e Statistikave e Kosovës, në bashkëpunim me Fondin për Popullsi të Kombeve të Bashkuara (UNFPA), kanë prezantuar raportin për parashikimin e popullsisë së Kosovës 2017-2061, ku në këtë raport parashihet që Kosova në vitin 2061 të ketë 1 milion e 500 mijë banorë.
Duke e krahasuar këtë numër të popullsisë me numrin e tanishëm të banorëve të Kosovës, që është 1 milion e 783 mijë e 531 banorë i bie që do të ketë rënie të popullsisë.
Po ashtu, në këtë raport është paraparë që të ketë edhe vjetërsim të popullatës së Kosovës, ku në vitin 2061 parashihet që mosha mesatare e popullatës të jetë 45 vjeç.
Kryeshefi Ekzekutiv i ASK-së, Isa Krasniqi, tha se ky raport ndoshta është alarmi i fundit për institucionet e Kosovës që të shohin se kah po shkojnë trendet e rënies së popullsisë në Kosovë.
“Pas publikimit të gjitha institucionet e Republikës së Kosovës duhet që të analizojnë shumë mirë këtë publikim sepse është ndoshta alarmi i fundit për politikëbërësit në Republikën e Kosovës të shohin se kah po shkojnë trendet e rënies së popullsisë në Republikën e Kosovës.
Në qoftë se e përcjellim këtë dekadë pas dekade do ta shihni se çfarë zbritje do të ketë popullsia e Kosovës në vitin 2061 në qoftë se mbetet trendi i tillë”, tha ai. (b.an)
