Lulzim Basha ka braktisur përfundimisht përkrahësit e opozitës të cilët ju përgjigjën thirrjeve të tij për të protestuar para kryeministrisë.
Edhe pse lideri i PD frymëzonte turmat për mosbindje civile dhe ndërmarrjen e akteve revulucionare, sot ka braktisur mbështetësit duke mos i dërguar as avokatin për t’i përfaqësuar ligjërisht.
Me urdhër të Bashës, avokati Artan Murrizi ka rrefuzuar të shkojë në seancën gjyqësore pa përcjellë asnjë njoftim për anëtarët e PD-së të cilët gjenden në mëshirë të fatit.
Teksa asnjë prej organizatorëve apo ushtruesit e dhunës nuk u ndalua duke i shpëtuar organeve ligjzbatuese, barra e përgjegjësisë ra mbi protestues të thjeshtë që u ndaluan nga policia me akuza absurde dhe zvarriten në ecejake gjyqësore sot e dy vite me radhë.
Të ardhur nga qytete të ndryshme të vendit, sot ata gjenden para godinës së gjykatës të pa përfaqësuar ligjërisht, të pa shpresë nga drejtësia dhe të zhgënjyer nga politika që përherë protestuesit i përdor vetëm si sqeparë për të çarë dyert e kryeministrisë.
“Ndjehemi thuajse të braktisur nga ata që na thirrën në protestë. Organizatorët dhe ushtruesit e dhunës ja hodhën paq duke mos i hyrë asnjë gjemb në këmbë. Sot jemi ne ata që vuajmë për papërgjegjshmëritë e tyre. Siç e shihni, avokati nuk ka ardhur ende dhe nuk ka hapur as telefonin. Siç na kanë informuar, është thënë që ne ta zgjidhim vetë pasi sipas tyre ne nuk kemi ardhur me zor në protestë. Është e vërtetë, por po aq e vërtetë është që ne ju bashkuam një kauze në emër të PD dhe thirrja të cilës ju përgjigjëm bëhej nga Lulzim Basha”, thonë përkrahësit e PD qe gjendeshin para dyerve të gjykatës. (TemA)
/b.h
