Hetimi dhe çlirimi i Presidentit Tramp nga dyshimet për influenca ruse në zgjedhjen e tij janë një ngjarje dhe një lajm shumë i mirë për mbarë familjen e kombeve të lira.
Kështu u shpreh në editorialin e tij analisti Preç Zogaj ndërsa në panel ishte i ftuar studiuesi Pirro Misha.
“Hetimi i prokurorit Muller i cili nuk gjeti lidhje mes Donald Trump dhe Valdimir Putin, e fuqizon presidentin e SHBA-ve” – tha Misha.
Sipas tij, edhe pse provat ishin të pakta, u krijua perceptimi se Trump ishte një katastrofë.
Studiuesi Pirro Misha komentoi edhe të ashtuquajturin ndikim rus në vendet e Ballkanit. Duke u ndalur në vendin tonë, ai tha se është në natyrën e çdo fuqie të përpiqet të ndikojë te fqinjët dhe më gjerë.
Por studiuesi solli edhe një detaj në panelin e emisionit ‘Java në RTSH’. Referuar fjalimit të kryeministrit Edi Rama në ceremoninë e 10-vjetorit të anëtarësimit në NATO, Misha u shpreh se për herë të parë u fol për aktorë të tretë.
“Rama foli për aktorë të tretë, jo vetëm për Rusinë. Kjo frazë kishte kohë që nuk artikulohej” – tha ai.
Misha u shpreh se nuk bëhet fjalë vetëm për Rusinë, por edhe për dy vende të tjera.
“Përveç Rusisë është në natyrën e Kinës dhe Turqisë të ndikojnë në vende të ndryshme. Në rastin e vendit tonë, Kina më pak ose aspak” – tha ai.
