Rusia ka kërcënuar Francën dhe Britaninë me hakmarrje, pas vendimit të dy vendeve për të rritur mbështetjen ushtarake ndaj Ukrainës dhe për t’i ofruar Kievit teknologji të ndjeshme raketore.
Zëdhënësja e Ministrisë së Jashtme ruse, Maria Zakharova, paralajmëroi se vendimet e Londrës dhe Parisit mund të sjellin “pasoja të paparashikueshme”.
Britania dhe Franca u zotuan të hënën, më 24 gusht, për të forcuar mbështetjen ushtarake për Ukrainën, përfshirë aksesin në teknologji të klasifikuar dhe përshpejtimin e dërgesave të raketave kundërajrore.
Në mënyrë të veçantë, Britania njoftoi se do t’i ofrojë Kievit akses në teknologji të klasifikuar për prodhimin e raketave lundruese Storm Shadow me rreze të gjatë veprimi, të afta për të goditur objektiva në thellësi të territorit rus.
Zakharova paralajmëroi Londrën se Moska mund të godasë objektiva ushtarake britanike, brenda dhe jashtë Ukrainës, nëse raketat britanike përdoren nga Ukraina për sulme ndaj territorit rus.
Ajo i bëri gjithashtu thirrje Britanisë të heqë dorë nga qëndrimi që Moska e konsideron armiqësor ndaj Rusisë, duke paralajmëruar se një qasje e tillë mund ta përshkallëzojë konfliktin në një nivel të ri.
Ndërkohë, Franca ka rënë dakord t’i ofrojë Ukrainës njohuritë teknike për projektimin e përbashkët të raketave franko-britanike.
