Tre persona, të moshës 44, 45 dhe 48 vjeç, u arrestuan të enjten në mëngjes, 23 tetor, në Londrën perëndimore dhe qendrore nën dyshimin se kanë ndihmuar një shërbim sekret rus, si pjesë e një hetimi të vazhdueshëm për sigurinë kombëtare, sipas policisë britanike.
Ata u ndaluan në bazë të nenit 3 të Aktit për Sigurinë Kombëtare, njoftoi policia metropolitane, ndërsa kontrollet vazhdojnë në adresat ku u kapën, si dhe në një vend tjetër në Londrën perëndimore.
Kombësia e të arrestuarve nuk u bë publike, por kreu i komandës kundër terrorizmit të Met-it tregoi se të akuzuarit dyshohen se kanë vepruar si ndërmjetës për një nga shërbimet sekrete ruse.
“Po shohim një numër gjithnjë e më të madh personash që ne i përshkruajmë si ‘prokurorë’ të rekrutuar nga shërbime të huaja inteligjence, dhe këto arrestime lidhen drejtpërdrejt me përpjekjet tona për të ndërprerë këtë lloj aktiviteti. Kushdo që mund të kontaktohet dhe tundohet për të kryer veprimtari kriminale në emër të një shteti të huaj këtu në MB duhet ta mendojë mirë. Kjo lloj veprimtarie do të hetohet dhe kushdo që rezulton i përfshirë mund të përballet me ndjekje penale dhe pasoja shumë serioze nëse dënohet”, tha Komandanti Dominic Murphy, drejtues i policisë kundër terrorizmit në Londër.
