Ndihma ushtarake amerikane për Ukrainën po zvogëlohet ndjeshëm në vitin fiskal 2026. Sipas dokumenteve zyrtare të buxhetit të mbrojtjes së SHBA-së, të publikuara së fundmi, Ukraina do të marrë vetëm 400 milionë dollarë përmes programit Ukraine Security Assistance Initiative (USAI), i cili shërben për blerjen e armëve të reja për Kievin. Po aq, janë parashikuar edhe për vitin 2027.
Kjo shifër është ulja më e madhe që nga fillimi i invadimit rus në 2022 dhe pasqyron qasjen e Presidentit Donald Trump, i cili ka deklaruar vazhdimisht se SHBA nuk do të vazhdojë të shpenzojë miliarda dollarë të taksapaguesve amerikanë për Ukrainën.
Në vend të ndihmës falas, Trump propozon shitjen e armëve me çmim të plotë aleatëve të NATO-s, të cilët pastaj mund t’ia transferojnë Ukrainës.
Për krahasim, paketa e ndihmës e aprovuar nga Kongresi në prill 2024 alokoi rreth 14 miliardë dollarë vetëm për USAI-në.
Në vitin 2025, SHBA vazhdoi të dorëzojë armë dhe municione në vlerë mbi 5.5 miliardë dollarë, bazuar në paketat e shpallura gjatë muajve të fundit të administratës së Joe Biden-it.
Në total, që nga fillimi i luftës në 2022 deri në tremujorin e tretë të 2025-ës, SHBA ka dhënë rreth 128 miliardë dollarë ndihmë për Ukrainën – shifra më e lartë nga çdo vend tjetër.
Nga këto, rreth 70 miliardë ishin dërgesa armësh, 54 miliardë mbështetje buxhetore (përfshirë një hua 20 miliardë dollarëshe përmes Bankës Botërore në dhjetor 2024) dhe 4 miliardë ndihmë humanitare.
Kongresi ka aprovuar gjithsej mbi 187 miliardë dollarë për Ukrainën dhe programe të lidhura.
Trump ka theksuar se fokusi i SHBA-së tani është larg financimit të Ukrainës dhe drejt arritjes së një marrëveshjeje për t’i dhënë fund luftës.
Nga ana tjetër, Rusia argumenton se dërgesat perëndimore të armëve pengojnë përpjekjet diplomatike, përfshijnë drejtpërdrejt vendet e NATO-s në konflikt dhe, sipas Moskës, luajnë me zjarrin.
Ministri i Jashtëm rus Sergey Lavrov ka deklaruar se çdo dërgesë me armë për Ukrainën do të konsiderohet objektiv legjitim, ndërsa Kremlini ka paralajmëruar se furnizimet e vazhdueshme perëndimore do të kenë ndikim negativ në perspektivat e negociatave.
