Një prej pjesëtarëve kryesorë të bandës së Bajrave në Shkodër, Safet Bajri kallëzon kreun e Burgjeve, Agim Ismailin.
Kallëzimi penal për drejtorin e Përgjithshëm të Burgjeve, është bërë në prokurorinë e posaçme për krim dhe korrupsion, e njohur si SPAK.
Shkak për kallëzimin është bërë refuzimi i Ismailit, për ta transferuar Bajrin nga burgu i Fierit ku ndodhet aktualisht në burgun e Belgjikës.
Si argument për kërkesën e transferimit është bërë pretendimi i Bajrit, se ndihet i kërcënuar për jetën e tij, prej të dënuarve të tjerë që vuajnë dënimin në burgun e Fierit.
Safet Bajri ndodhet në burg i dënuar me 9 vite nga drejtësia belge, dënim i cili është njohur nga Gjykata e Shkodrës.
“I forti” i Shkodrës është dënuar në 25 janar 2017 nga Gjykata e Apelit e Brukselit me 9 vite burg, si kreu i një organizate kriminale të trafikut të drogës dhe prostitucionit në kryeqytetin belg.
Kjo organizatë akuzohej se ishte përgjegjëse gjithashtu për shkatërrim të pronës, përdorim të armëve të zjarrit, tentativë vrasje, zhvatje e trafik të qenieve njerëzore me qëllim prostitucionin.
/a.r
