Muaji qershor ka sjellë një rënie të besimit te bizneset e ndërtimit, të cilat presin më pak porosi në muajt e ardhshëm dhe një ngadalësim të mëtejshëm të rritjes së çmimeve të banesave.
Treguesi i besimit në sektorin e ndërtimit ra me 0.8 pikë përqindje gjatë qershorit. Kjo lidhet kryesisht me vlerësimet më pesimiste për kontratat dhe porositë e reja, ndërsa aktiviteti aktual i ndërtimit ka mbetur pothuajse i pandryshuar.
Për të tretin muaj radhazi, ndërtuesit raportojnë pritje më të dobëta për porositë. Numri i atyre që mendojnë se kërkesa do të bjerë është më i lartë se i atyre që presin rritje.
Edhe pritjet për çmimet kanë ndryshuar. Megjithëse shumica ende besojnë se çmimet do të mbeten në rritje, ritmi i pritshëm është ulur ndjeshëm krahasuar me muajt e mëparshëm. Kjo tregon se gjithnjë e më shumë kompani presin stabilizim ose rënie të çmimeve.
Edhe tregu i banesave po jep sinjale ngadalësimi. Çmimet vazhdojnë të jenë më të larta se një vit më parë, por ritmi i rritjes është zbutur, sidomos në Tiranë, ku çmimet kanë mbetur pothuajse të pandryshuara krahasuar me gjashtëmujorin e mëparshëm.
Ndërkohë, pavarësisht pritjeve më të dobëta për kërkesën, ritmi i ndërtimeve mbetet i lartë. Të ardhurat nga taksat lokale të lidhura me ndërtimin janë rritur ndjeshëm gjatë pesë muajve të parë të vitit, duke treguar se janë dhënë leje për një sipërfaqe shumë të madhe ndërtimi.
Sipas përllogaritjeve të bazuara në këto të dhëna, vetëm në pesë muajt e parë të vitit janë miratuar leje për rreth 2 milionë metra katrorë ndërtime, një nivel që i afrohet rekordit të shënuar gjatë gjithë vitit 2024. Kjo tregon se projektet e reja të ndërtimit pritet të vazhdojnë me ritme të larta, edhe pse kërkesa në treg po jep shenja dobësimi.
/Marrë nga Monitor
