Kodi i Procedurës Penale detyron Prokurorinë dhe Gjykatën e Krimeve të Rënda që dosjet e korrupsionit dhe krimit të organizuar t’i kalojë pranë Strukturës së Posaçme Antikorrupsion (SPAK).
Por në mungesë të saj krijohen probleme. Për këtë gjë ka folur dje kreu i Gjykatës së Krimeve të Rënda, Sandër Simoni, i cili ka dhënë detaje mbi ngritjen e SPAK dhe mënyrën se si do procedohet me dosjet e mëdha.
“Gjykata e Krimeve të Rënda riemërtohet në Gjykata e Antikorrupsionit dhe e Krimit të Organizuar.
Ky proces nuk ka ndodhur ende se pasi është i kushtëzuar nga krijimi i Këshillit të Lartë Gjyqësor.
Në këto kushte në dispozitat kalimtare meqë hyrja në fuqi e kodit në datën e sotme nuk përkon me krijimin e strukturave antikorrupsion të SAPK dhe Gjykatës së re të Posaçme është parashikuar në dispozitat kalimtare të kodit në nenin 285 që deri në krijimin e Gjykatës së Posaçme, veprat penale në kompetencë të Gjykatës së Krimeve të Rënda do vazhdojnë të gjykohen po nga kjo gjykatë.
Gjithashtu edhe për Prokurorinë është parashikuar që deri në krijimin e Prokurorisë së Posaçme çështjen e hetimit për veprat penale sipas nenit 75/a të ndryshuar që do jetë në kompetencën e Gjykatës së Posaçme, do vijojnë të hetohen nga Prokuroria për Krime të Rënda sipas përcaktimeve përpara hyrjes në fuqi të këtij kodi”, tha ai.
Simoni deklaroi se shumë prej veprave penale që janë tashme do t’i kalojnë për kompetencë gjykatave të rretheve, dhe për këtë shpreh pak rezerva në lidhje me politikën penale që mund të ndiqet në këto gjykata.
“Shohim në aspektin e analizës retrospektive që nga viti 2013 e këtij na rezulton që krimi në familje është një nga fenomenet kriminale tipike përderisa kemi patur nivel të lartë të krimit në familje.
Vrasje për shkak të marrëdhënieve familjare në një vit gjyqësor numri i tyre ka vajtur deri në 40 vepra penale të tilla. Gjykimi i tyre nga një gjykatë e veçantë siç ishte gjykata jonë sillte një politikë më të përshtatshme penale në raport me këto persona, pasi presupozohet që në këtë rast këto çështje hetoheshin nga një strukturë e specializuar dhe nga një gjykata e posaçme siç ishte Gjykata e Krimeve të Rënda.
Kam përshtypjen se shpërndarja e tyre në gjykata rrethit mund të sjellë disproporcion sa i përket politikës penale”, tha ai për “Ora News”.
