Deputeti demokrat Ervin Salianjni dhe Ministri i brendshëm, Bledi Çuçi, kanë replikuar ashpër me njëri-tjetrin sa i përket vendimit të fundit të qeverisë për ndërtimet pa leje, i cili detyron ndërtuesin që ose ta blejë me çmim tregu ose i konfiskohet.
Sipas deputetit Salianji sërish policia dhe qeveria po veprojnë me dy standarde, pasi për një çati pa leje një qytetar i thjeshtë përfundon në burg, por në rastin e oligarkut nuk ndodh kjo gjë.
Por për Ministrin e Brendshëm Bledi Çuçi, ky vendim i qeverisë shërben për mbledhje kapitali i cili më pas do të ndihmojë për strehimin e të pastrehëve.
Pjesë nga replikat:
Salianji: E njëjta gjë për dy standarde në zbatimin e ligjit z.ministër për ndërtimet e paligjshme. Nëse një qytetar në çdo cep të Republikës përfundon në burg për avlli, për çati, për dritare, se për shtëpi nuk bëhet fjalë e njëjta gjë duhet të ndodh dhe me ata që janë oligarkë.
Çuçi: Ju thoni tani që ata të taksohen 5%, ndërsa ne po u themi se ata po tatohen 120%. Si u pasurokan këta oligarkët që thoni ju kur ne i tatojmë me 120%. E para e bëjmë që të kemi sa më shumë kapital për të ndihmuar njerëzit e pastrehë.
Salianji: Nuk është e vërtetë, nuk po e bëni që të paguajnë para. Nëse 100 m katrorë ndërtim këtu përballë nesh, te një nga kullat e paligjshme shitet sot në treg me 500 mijë euro, 5 mijë euro metri katrorë, ai oligarku që e ka ndërtuar jo vetëm që ka shmangur taksat, pjesën e pronarit dhe për qeverinë do e marrë maksimale 2 mln lekë të vjetra, por ndërkohë ka shmangur burgun se duhet të përfundonte në burg. Kujt po ia thoni këtë dolëm ne po prishim ndërtimet e paligjshme. Thoni se kjo është deviza jonë, do bashkëpunojmë me oligarkët, me këta që paguajnë para, këta të tjerët le të ikin me gomone në Angli dhe kjo është më e ndershme. Ka dy standarde në zbatimin e ligjit në këtë vend, po ia kërkoj ministrit të brendshëm që e ka në varësi. E njëjta strukturë që varet nga ju ka pasur kallëzime penale.
g.kosovari
