Danezët janë mërzitur shumë sot nga vendimi i CAS, që i dha Shqipërisë tre pikët e ndeshjes me Serbinë. Madje ata kanë folur edhe për komplote kundër tyre. Por historia e futbollit është e gjatë dhe kombëtarja jonë, me bilancin modest, nuk ka qenë ndonjëherë protagoniste komplotesh ndaj të tjerëve. Nga ana e saj Danimarka kujtohet për shembull, për një barazim me Suedinë në Kampionatin Europian të vitit 2004, i cili edhe sot të skandalizon kur e sheh.
Fabula është e thjeshtë. Italia pretendonte hyrjen në çerekfinalet e Europianit portugez. Por asaj, që të ecte përpara, i duhej një fitore e Danimarkës mbi Suedinë, ose çdo barazim mes të dyjave, përveç shifrave 2-2. Gjejeni sa për përfundoi takimi mes dy kushërinjve skandinavë! Pikërisht barazim me rezultatin dy me dy! Pas ndeshjes, trajneri Morten Olsen luajti madje edhe teatrin e rradhës, para gazetarëve që qeshnin me ironi: “provuam ta fitojmë me të gjitha mënyrat ndeshjen, por s’ja dolëm dot”. Kjo ndeshje e trukuar skandinave ka hyrë tashmë në enciklopedinë e trukimeve sportive.
