Babai i gjyqtares së ndjerë Fildeze Hafizi ka ndërruar jetë një ditë më parë.
Pak orë para vdekjes ai kishte lënë një letër në të cilën shpreh shqetësimin se vrasësi i të bijës mund të lirohet.
Letrën ai e ka adresuar për presidentin Ilir Meta, ministren e Drejtësisë Etilda Gjonaj, kreun e Gjykatës së Lartë Xhezair Zaganjori dhe ambasadorëve Donald Lu e Romana Vlahutin.
Në letër babai Bynjamin Hafiziit kërkon sensibilizimin e institucioneve dhe vetëm vendosjen e drejtësisë mbi këtë çështje.
Letra i është drejtuar kryetarit të gjykatës së Lartë Xhezair Zaganjori dhe mban firmën e Bynjamin Hafizit, babait të gjyqtares së ndjerë.
Z. Hafizi, sqaron nëpërmjet kësaj letre se gjyqi i vrasësit të gjyqtares po zvarritet dhe për këtë arsye ai kërkon veprimin sa më të shpejtë të gjykatës së Lartë, ku dosja ka ardhur për të përcaktuar kompetencën e gjykatave.
“Po ju drejtohem juve z.Zaganjori si kryetar i gjykatës së lartë, ju lutem të merrni në konsideratë dhe me prioritet këtë kërkesë në mënyrë të tillë që Kolegji Penal i Gjykatës së Lartë të shprehet brenda afatit 30 ditor lidhur me gjykatën kompetente që gjykimin e kësaj dosjeje”, shkruan Bynjamin Hafizi.
Ai shton më tej se shqyrtimi gjyqësor duhet të fillojë sa më parë në mënyrë që ky vrasës të dënohet siç e meriton pa u rrezikuar përfundimi i afateve të paraburgimit. Duke kujtuar sloganin drejtësi e vonuar, drejtësi e mohuar, babai i gjyqtares shton më tej në letrën e tij:
Po kërkojmë që drejtësia të vihet në vend të paktën kësaj rradhe. Jemi të lënduar dhe i vetmi ngushëllim do të ishte dhënia e drejtësisë dhe jo zvarritja e saj. /b.d
