Reshjet e dëborës janë ndërprerë por temperaturat vijojnë të bien. Instituti i Gjeoshkencave, Energjisë, Ujit dhe Mjedisit infomon se temperaturat do të bien me 6 gradë gjatë ditës së nesërme.
Sipas njoftimit të publikuar, reshjet do të ndërpriten gjatë ditës së nesërme por do të vijojë ulja e temperaturave.
Nga dita e shtunë deri të mërkurën nuk priten reshje, por temperaturat duke nisur nga data 6 deri në datën 9 janar do të bien ndjeshëm duke bërë që prania e ngricave të jetë në të gjithë vendin, bëhet e ditur në informacionin e ofruar nga IGJEUM.
Në zonat e thella malore në veri dhe në lindje, temperaturat në fundjavë mund të zbresin deri në -20 gradë, ndërsa në zonën perëndimore dhe në bregdet deri në -9 gradë.
Nesër do të ketë një rënie me 6 gradë në vlerat e mëngjesit, duke bërë që edhe gjatë ditës temperaturat të jenë negative në të gjithë vendin. Pasnesër (të dielën) do të ketë një rënie me rreth 2 gradë. Të hënën deri të mërkurën pritet që të ketë rritje, por graduale të temperaturave.
Era të premten do të vazhdojë që të fryjë e fortë, veçanërisht në bregdet dhe në terrenet malore, për momente të shkurtra, mbi 70 km/orë. Të shtunën ajo do të fillojë që të dobësohet gradualisht./a.m.
