Mijëra përdorues në mbarë botën raportuan probleme me platformat e kompanisë Meta, Facebook, Instagram dhe Messenger, gjatë ditës së sotme, e diel, 19 korrik 2026.
Sipas të dhënave nga platforma e monitorimit të ndërprerjeve Doundetector, numri i raportimeve për probleme teknike u rrit ndjeshëm në faqet ndërkombëtare dhe në atë të Afrikës së Jugut. Raportimet e para nisën pak para orës 09:30, ndërsa rreth orës 10:00 mijëra përdorues po dërgonin ankesa çdo 15 minuta.
Problemet duket se kanë prekur kryesisht versionet e platformave në shfletuesit e internetit. Përdoruesit që tentonin të hapnin Facebook përmes një brouser-i përballeshin me një mesazh gabimi, ku thuhej se llogaria ishte përkohësisht e padisponueshme.
Mesazhi i shfaqur nga Facebook informonte përdoruesit se problemi lidhej me një çështje teknike të faqes dhe se pritej të zgjidhej brenda një kohe të shkurtër. Ndërkohë, Instagrami në versionin ueb mund të hapej, por shumë përdorues raportuan se përmbajtjet e reja nuk ngarkoheshin ose vonoheshin gjatë hapjes. Aplikacionet mobile të Facebook dhe Instagram dukeshin se funksiononin normalisht për shumicën e përdoruesve.
Edhe aplikacioni tjetër kryesor i Meta-s, WhatsApp, nuk u raportua si i prekur nga kjo ndërprerje.
