Edhe kjo e hënë i ngjasoi seancave parlamentare të këtyre javëve kur opozita bllokon, hedh tymuese e flakadanë e përmbys karrige, si reagim për të plotësuar kërkesat e saj, ndërsa kryeparlamentarja Nikolla e mbylli seancën në kohë rekord.
Por ndryshimi sot ishte se konfliktualiteti i deputetëve të opozitës ishte më i madh me Gardën, e cila tentoi kontrolle më të imtësishëm të tyre, por nuk ia doli pasi tymueset dhe flakadanë u ndezën sërish në sallë. Jo vetëm kaq. Flamur Noka dhe Edi Paloka i vunë zjarrin edhe rregullores dhe letrave që gjetën mbi tavolinat e deputetëve dhe i hodhën mes karrigeve përmbys.
Por ndryshe nga më herët, pas asaj që ndodhi sot, Ministri i Brendshëm, Taulant Balla përmendi burgun për deputetët e opozitës.
Për këto zhvillime u diskutua këtë të hënë në Debat nga Alba Alishani në A2 CNN. Deputeti demokrat, Edmond Spaho, u shpreh se për këtë situatë kanë reaguar këtë herë edhe ndërkombëtarët, të cilët sipas tij, kanë qenë të ftohtë gjatë kohëve të fundit me opozitën.
“Ne jemi të shtyrë në një situatë të tillë nga qëndrimet e mazhorancës, e cila na mohon të drejtat kushtetuese si opozitë. Nëpërmjet komisioneve hetimore ne ushtrojmë funksionin tonë si opozitë. Pasi ka kapur të gjitha pushtet, Rama po tenton të kapë edhe opozitën.
Ky është një grusht shteti real. Ne do të reagojmë, nuk pranojmë të mbetemi opozitë fasadë. Ndërkombëtarët kanë qenë të ftohtë për arsyet e opozitës. Megjithatë, këtë herë reaguan të gjithë ndërkombëtarët në Tiranë, por edhe në Bruksel. Në raportin e publikuar së fundmi, respektimi i të drejtave të opozitës janë kushte bazë për integrim në BE. Edhe faktori ndërkombëtar që ka qenë i ftohtë me opozitën, filloi të reagojë sepse e shikon që po shkelen të drejtat e opozitës.
Pavarësisht se ata i miratojnë ato ligje, si për opinionin e brendshëm dhe ata janë, tregohet se ky parlament nuk është funksional. Në Reuters ishin botuar fotografitë e situatës në Parlament. Kjo është një situatë që nuk na nderon dhe mazhoranca duhet t’i thërresë arsyes dhe të plotësojë kërkesat”, tha Spaho./m.j
