Nafail Maliqi, kryeredaktor i gazetës zviceriane në shqip në një videomesazh në emisionin “Jetë Shqiptare” deklaroi se ndarja nga jeta e shkrimtarit të madh, Ismail Kadare, është një lajm i trishtë për mbarë botën.
Maliqi u shpreh se ka realizuar shumë intervista me Kadarenë, dhe se sipas tij, humbja e shkrimtarit është ditë zie për mbarë shqiptarët dhe literaturën botërore.
“Lajmi për vdekjen e Ismail Kadaresë, shkrimtari jon i madh, ishte një lajm i trishtë dhe shumë pikëllues për mbarë shqiptarët në diasporë, në botë. Ky rast ishte një ditë zi për mbarë shqiptarët dhe literaturën botërore.
Z.Kadare ishte shkrimtar i përmasave të mëdha, me librat e tij nga Gjenerali i Ushtrisë së vdekur, deri më sot. Ne humbëm një njeri të madh, ishte gjeneral, ambasador i letrave shqipe.
Kam pas së paku 10 intervista që fliste përveç literaturës shqiptare edhe për literaturën botërore, po ashtu fliste me mjaft shqetësim për shqiptarët në Luginën e Preshevës dhe kurrë nuk kishte harruar të përmendte tokat tona shqiptare dhe shpesh thoshte: ju keni mbetur e vetmja copë e kombit tonë të okupuar në regjimin sllav serb”, tha Maliqi i cili solli në kujtesë dhe një prej takimeve që i ka mbetur në mendje me të ndjerin Kadare.
“Takimet e para, unë vendosa për Kadarenë një dhuratë të vogël, një këmishë, numër 44 ishte dhe kur ja dhashë, më tha: qenke harxhuar, por biles ma more pak më të vogël numrin.
Aty u skuqa, më erdhi keq. Dhe i thash: Z.Kadare duke menduar se ju jeni shkrimtar i madh, dhe këmishën e madhe e mora. Dhe plasi gazit, ishte dhe zonja Elena Kadare. Më tha: nuk e mbaj mend të kem qeshur kështu me lot. Tha se do e fuste në një prej librave të tij atë bisedë simpatike.
Më tha; ju nuk jeni rastësisht gazetar, dite, shpëtove.
Të shumta ishin takimet me z. Kadare. Shumë herë ka qenë në Zvicër. Në çdo ekspozitë që mbahet në Gjenevë dhe në botë, libri i Kadaresë ka qenë prezentë. Madje dhe ai ishte prezentë kur bënte promovimin e librave të tij”, tha Maliqi ndërsa i shprehu ngushëllime familjarëve të Kadaresë.
