Ish-deputeti i PD, Ervin Salianji ka ngushëlluar komunitetin ortodoks në vend për ndarjen nga jeta të Kryepeshkopit të Shqipërisë, Anastas.
Në një mesazh në rrjetet sociale, Salianji vlerëson se Janullatos për 33 vjet me radhë kontribuoi në ringjalljen e besimit ortodoks dhe rindërtimin e infrastrukturës së Kishave në vend, pas shkatërrimit dhe persekuptimit nga regjimi i kaluar.
Salianji thekson se Janullatos ishte një misionar i Krishtit ndërsa shton se edhe në ditët e fundit të jetës së tij ai u kujdes për plotësimin e klerit me peshkopë të rinj shqiptarë.
Mesazhi i ngushëllimit
Me keqardhje u njoftova për ndarjen nga jeta të Fortlumturisë së Tij, Kryepiskopit të Tiranës, Durrësit dhe gjithë Shqipërisë, Prof. Dr. Anastas Janullatos.
Primati i Kishës Ortodokse Autoqefale të Shqipërisë është një hierark i dimensioneve botërore, akademik dhe teolog me kontribut shumëvjeçar në dialogun dhe harmoninë ndërfetare, pajtimin mes popujve dhe paqen në botë.
Ai për më shumë se 33 vjet kontriboi në ringritjen nga hiri të besimit ortodoks dhe rindërtimin e infrastukurës kishtare, që ishin shkatërruar plotësisht nga persekutimi komunist. Edhe ditët e fundit të jetës së tij ai u kujdes për plotësimin e klerit me peshkopë të rinj shqiptarë si një misionar i Krishtit.
Mendimet e mia sot, bashkohen me komunitetin ortodoks shqiptar dhe lutem bashkë me ta që Zoti ta prehë shpirtin e Kryepiskopit Anastas së bashku me rrjeshtat e shenjtorëve dhe martirëve të Kishës, së cilës ai i shërbeu me vetëmohim.
I përjetshëm qoft kujtimi i Tij
