Ish-kryeministri i Kosovës, Bujar Bukoshi ka ndërruar jetë në moshën 78 vjeçare.
Në lidhje me këtë ngjarje të trishtë ka reaguar Pandeli Majko, i cili e quan Bukoshin si një njeri që tejkaloi veten.
Ndër të tjera në postimin e tij në rrjetet sociale, Majko shprehet se, Bukoshi ishte një politikan i dorës së parë që nuk imitoi askënd. Ai thekson se ish-kryeministri, Bukoshi ishte një zgjedhje e mençur e Ibrahim Rugovës në rrugën e vështirë që Kosova kishte përpara në atë kohë.
“Sot, Kosova ka humbur një protagonist të historisë së saj”, thotë ndër të tjera Majko.
Postimi i Pandeli Majkos:
Bujar Bukoshi ka ndruar jetë! Kryeministri i parë i Republikës së Kosovës ka qenë një njeri që tejkaloi veten!
Vdekja për cilindo është ajo që ndodh në fund! Për Bujarin, është stacioni i fundit për të kuptuar si bëhet njeriu ai që është!
Bujar Bukoshi ishte një zgjedhje e mençur e Ibrahim Rugovës në rrugën e vështirë që Kosova kishte përpara! Edhe për këtë arsye Bujari u bë kryeministri Bukoshi i cili pati një jetë të paprecedentë për të parë të gjitha të vertetat që një individ mund të duroj!
Bujar Bukoshi ishte kryeministër i një shteti që nuk ekzistonte duke qenë një “lajmës” i çuditshëm për atë që po vinte për Kosovën!
E shkuara është peshë! Nuk mund të “notosh” po nuk e mbajte mbi shpinë!
Në kohët kur duket se na përkufizojnë gënjeshtrat dhe sekretet, Bujar Bukoshi është ndër të vërtetat që ka prodhuar historia e Kosovës!
Kopja tingëllon si një melodi e kënduar nga një fëmijë, e kompozuar nga dikush tjetër! Sot, Kosova ka humbur një politikan të dorës së parë i cili nuk imitoi askënd!
Për Bujar Bukoshin, meritat vlejnë më shume se dobësitë e tij! Ai kishte bërë paqe me veten dhe të kaluarën!
Sot, Kosova ka humbur një protagonist të historisë së saj! Lamtumirë Bujar!
