Presidenti i Republikës, Bajram Begaj, ka reaguar pas ndarjes nga jeta të aktorit të njohur shqiptar Birçe Hasko, duke e cilësuar humbjen e tij si një goditje të madhe për botën e artit shqiptar.
Në mesazhin e tij, kreu i Shtetit u shpreh se “bota e artit shqiptar humbi sot një nga figurat më të spikatura të saj”.
Birçe Hasko, i njohur si një nga emrat më të mëdhenj të skenës dhe ekranit shqiptar, la gjurmë të çmuara me rolet e tij të paharrueshme, duke u bërë pjesë e historisë së kinematografisë dhe teatrit shqiptar.
Përveç karrierës së tij të pasur si aktor, Hasko ia kushtoi jetën edhe edukimit, duke qenë një pedagog i nderuar që formoi breza të tërë aktorësh. Kontributi i tij në art dhe arsim mbetet i pazëvendësueshëm, ndërsa kujtimi i tij do të jetojë gjatë në memorien e publikut dhe studentëve që e patën si udhërrëfyes.
“Lamtumirë ‘Mjeshtri i Madh’ Birçe Hasko!”, përfundoi mesazhin e Presidentit Begaj, duke nderuar figurën e tij si një ikonë të kulturës shqiptare.
